Bruce Melodie, Alicia na Germaine mu begukanye ibihembo Rubavu M

Ibi birori byabaye mu ijoro ryo ku wa 13 Kamena 2026, byari bibaye ku nshuro ya kabiri, bikaba bigamije gushimira no guha imbaraga abahanzi, aba-DJ, abatunganya umuziki n’abandi bafite uruhare mu iterambere ry’umuziki wo mu Karere ka Rubavu no mu gihugu muri rusange.

Ibirori byitabiriwe n’abantu batandukanye barimo Minisitiri w’Urubyiruko n’Iterambere ry’Ubuhanzi, Dr. Utumatwishima Abdallah; Umuyobozi w’Akarere ka Rubavu, Mulindwa Prosper; abahanzi, abanyamakuru ndetse n’abakunzi b’umuziki, abayobozi b’inzego z’ibanze, abahanzi, abanyamakuru ndetse n’abakunzi b’umuziki.

Mu ijambo rye, Minisitiri Utumatwishima yashimye gahunda yo gutegura ibi bihembo, avuga ko bifasha mu kuzamura impano z’abahanzi bo mu Ntara y’Iburengerazuba no kubaha icyizere cyo gukomeza gukora umuziki ugezweho.

Mu bahanzi begukanye ibihembo harimo Josskid wegukanye igihembo cya “Best Male Artist of the Year”, Fica Magic wegukanye “Best R&B Artist of the Year”, ndetse na Kanyota wegukanye “Best Female Artist of the Year”.

Itsinda ry’abavandimwe Alicia & Germaine rikora umuziki wa Gospel ryegukanye ibihembo bibiri birimo “Best Gospel Artist of the Year” n’icya “Best Video Song of the Year” ku ndirimbo yabo “Ibendera”.

Umuraperi Phill Pauz yegukanye igihembo cya “Best Hip Hop Artist of the Year”, mu gihe Rugamba Logan yahawe icya “Best Boost Artist of the Year”.

Indirimbo y’umwaka yabaye “Cebo” ya T Blaise na Kanyota, naho Bertz Beat atorwa nk’umu-producer wahize abandi. Umunyamuziki uvanga imiziki wahize abandi yabaye Selekta Dady.

Abegukanye ibihembo bya Rubavu Music Awards & Talent Detection 2026

1.Rubavu Best Male Artist of the Year: Josskid

2.Rubavu Best R&B Artist of the Year: Fica Magic

3.Rubavu Best Female Artist of the Year: Kanyota

4.Rubavu Best Gospel Artist of the Year: Alicia & Germaine

5.Rubavu Music Director of the Year: Big Deal

6.Rubavu Best Hip Hop Artist of the Year: Phill Pauz

7.Rubavu Boost Artist of the Year: Rugamba Logan

8.Rubavu Best Song of the Year: “Cebo” ya T Blaise ft Kanyota

9.Rubavu Audio Producer of the Year: Bertz Beat

10.Rubavu Best DJ of the Year: Selekta Dady

11.Rubavu Best Video Song of the Year: “Ibendera” ya Alicia ft Germaine

12.Countrywide Artist of the Year: Bruce Melodie

Mu rwego rwo gususurutsa abitabiriye ibi birori, bamwe mu bahanzi bakorera mu Karere ka Rubavu bakoze ibitaramo byashimishije benshi, barimo Phill Pauz wasusurukije abakunzi b’umuziki n’indirimbo ze zakunzwe. Ndetse, abahanzi barimo Riderman na Bwiza bataramiye abitabiriye igitaramo.

Rubavu Music Awards ni ibihembo bitegurwa ku bufatanye na Vision Jeunesse Nouvelle (VJN) na Future Novelty Company ku bufatanye n'Akarere ka Rubavu. Ikomeje guteza imbere impano z’abahanzi bo mu Ntara y’Iburengerazuba, aho abahanzi bahabwa umwanya wo kumenyekana no gushimirwa uruhare rwabo mu guteza imbere umuziki nyarwanda.

Minisitiri w’Urubyiruko n’Iterambere ry’Ubuhanzi, Abdallah Utumatwishima, yijeje abategura ibi bihembo ko Minisiteri ayoboye izakomeza kubatera inkunga ndetse ikanayongera mu rwego rwo gushyigikira ibikorwa bigamije kuzamura impano z’abahanzi bo mu Karere ka Rubavu no mu gihugu muri rusange.