Botswana: Diyama ya kabiri nini ku Isi ya carats 2,488 yabonye umuguzi nyuma y’imyaka hafi ibiri

Iyi diyama yacukuwe na kompanyi yo muri Canada, Lucara Diamond Corp, muri Kanama 2024, ikaba ari yo diyama nini cyane yavumbuwe muri Botswana kugeza ubu.

Ku ikubitiro hatangajwe ko ipima carats 2,492, ariko nyuma yo kuyisukura no gukuraho uduce twakuweho mu isuzuma, uburemere bwayo bwemejwe ni 2,488.32 carats.

Iyi Kompanyi ya Lucara yatangaje ko Motswedi yagurishijwe mu gihembwe cya kabiri cya 2026, ariko ntiyatangaza umuguzi wayo cyangwa amafaranga yaguzwe.

Igurishwa ryayo ryagaragaye muri raporo y’imari y’iki kigo, aho Lucara yatangaje ko yinjije miliyoni 41 z’amadolari mu gihembwe cya kabiri; gusa ntabwo yagaragaje umubare w’amafaranga Motswedi ubwayo yagurishijwe.

Diyama ya kabiri nini ku Isi

Ubunini bwa Motswedi ni bwo buyishyira mu mwanya udasanzwe mu mateka y’amadiyama. Ikigo kizwi ku isi mu gusuzuma amadayama, Gemological Institute of America (GIA), cyemeje ko Motswedi ari diyama ya kabiri nini mu madayama y’ibanze afite ubuziranenge bwo hejuru yabonetse mu mateka.

Nk’uko tubikesha ikinyamakuru Business Insider Africa, iyirusha ubunini ni Cullinan, yavumbuwe muri Afurika y’Epfo mu 1905, ipima carats 3,106. Bityo Motswedi, ifite carats 2,488.32, isigara ku mwanya wa kabiri nyuma y’iyo diyama izwi cyane mu mateka.

GIA kandi yagaragaje ko Motswedi ari diyama ibonerana, ifite ibara ry’umweru uvanze n’ikigina, kandi igizwe n’ibuye rimwe rifite uduce twinshi.

Kuki yamaze hafi imyaka ibiri itaragurishwa?

Nubwo ari diyama idasanzwe cyane, kuyishyira ku isoko no kuyibonera umuguzi ntibyari byoroshye.

Impamvu imwe ikomeye ni uko amadiyama manini nk’aya ataboneka kenshi, ku buryo uburyo busanzwe bwo kugena igiciro cy’amadiyama budahita bukoreshwa kuri yo.

Lucara yari yaragaragaje ko kugurisha no kubyaza umusaruro amabuye manini cyane bishobora gufata igihe bitewe n’ibikorwa byinshi birimo kuyamamaza, kuyasuzuma, kugena agaciro kayo, gutekereza ku buryo yakatwa cyangwa igatunganywa, ndetse no kubona umuguzi.

Motswedi yari ikiri mu bubiko bwa Lucara ku itariki ya 31 Ukuboza 2025, ndetse no muri raporo y’igihembwe cya mbere cya 2026 yari itaragurishwa. Ibi byerekana igihe kirekire cyafashwe kugira ngo haboneke umuguzi wayo.

Hari kandi amahitamo atandukanye ku cyakorwa kuri diyama nk’iyi. Ishobora gukatwamo amadiyama menshi mato, ariko ishobora no gusigara uko iri kubera ubunini n’amateka byayo, ikaba ikintu cyagirwa umutako cyangwa ikerekanwa mu ngoro ndangamurage.

Motswedi bisobanuye iki?

Izina Motswedi ryahawe iyi diyama nyuma y’uko Lucara isabye Abanya-Botswana gutanga amazina ashobora kuyihabwa.

“Motswedi” ni ijambo ryo mu rurimi rw’Igitswana rukoreshwa muri Botswana, Afurika y’Epfo, n’ahandi, rifitanye isano n’isoko y’amazi cyangwa amazi yo munsi y’ubutaka asohokera ku buso.

Lucara yavuze ko mu gushaka uburyo bwo kugurisha iyi diyama yashakaga ko amahitamo azafatwa ku byerekeye Motswedi agira umumaro ukomeye, kandi urambye kuri Botswana.

Karowe, ikimenyabose mu kuvumbura amadiyama manini

Motswedi si yo diyama nini yonyine yavumbuwe mu kirombe cya Karowe.

Ikirombe cya Karowe, gicungwa na Lucara, ni kimwe mu birombe bizwi cyane ku Isi mu kuvumburamo amadiyama manini kandi afite ubuziranenge bwo hejuru.

Mu yandi mabuye akomeye yavumbuwemo harimo Sewelô ya carats 1,758, Lesedi La Rona ya carats 1,109 na Constellation ya carats 813.

Muri Nyakanga 2026, Lucara yatangaje ko muri Karowe havumbuwe indi diyama nini ipima carats 1,305.4. Yabaye diyama ya 10 ipima hejuru ya carats 1,000 ivumbuwe muri iki kirombe kuva cyatangira gutanga umusaruro.

Ibi bikomeza gushimangira umwihariko wa Karowe mu bucukuzi bw’amadiyama manini, ndetse n’umwanya wa Botswana nk’igihugu gifite uruhare rukomeye ku isoko ry’amadiyama.

Isoko ry’amadiyama ririmo impinduka

Igurishwa rya Motswedi rije mu gihe isoko ry’amadiyama risanzwe ririmo guhinduka. Amadiyama akorerwa muri laboratwari amaze kwiyongera ku isoko, mu gihe ibiciro by’amadiyama asanzwe, cyane cyane ayari mu byiciro bitari ibyihariye cyane, biri guhura n’igitutu.

Lucara na yo yavuze ko mu gihembwe cya mbere cya 2026 ibiciro kuri carat byagabanutse mu bice bimwe by’isoko, bitewe n’ibicuruzwa byinshi biri ku isoko ndetse n’imyumvire y’abaguzi.

Ariko ku madiyama adasanzwe cyane nka Motswedi, ibintu biratandukanye. Ubuke n’ubunini bwayo bituma agira isoko ryihariye, aho abaguzi bashobora kuba abayakusanya, abashoramari cyangwa abandi bantu bashaka amabuye afite amateka adasanzwe.

Kugeza ubu, nubwo Lucara yamaze kwemeza ko Motswedi yabonye umuguzi, izina ry’uwaguze iyi diyama ndetse n’igiciro nyacyo yaguzweho ntibiratangazwa.

Motswedi rero ikomeje kwandika amateka: kuva yavumburwa muri Botswana, ikemezwa nk’iya kabiri nini ku Isi mu madiyama afite ubuziranenge bwo hejuru, kugeza ubwo yabonye umuguzi nyuma y’imyaka hafi ibiri.