Nk’uko Bolingo abisobanura, iyi Album yamaze gutangirira ku
rubuga rwe rwa internet, aho ayicururiza ku giti cye, ariko yiteguye ko izajya
ku mbuga zindi zicururizwaho umuziki nka YouTube guhera muri Gashyantare 2026.
“Inyenyeri” ni Album ya kabiri Bolingo ashyize ku isoko nyuma
ya “Umucancuro” yasohotse ku mugaragaro mu 2022, nyuma y’uko asoje amasomo ye
mu ishuri ry’ubuhanzi rya Nyundo.
Uyu muzingo urimo indirimbo 19 zirimo: Umurinzi, Akabando,
Ese Urihe, Inyenyeri, Isano, Iwabandi, Karira, Mpumuriza, Mukobwajana,
Mutabare, Ngwino Unsange, Sebeya, Sinicuza (yakoranye na King James), Uri Intwari
(Mama), Umutunzi Mutindi, Umwungeri, Urugendo, Ihogoza (yakoranye na Mani
Martin) na Bushya (yakoranye na Okkama).
Bolingo Paccy atangaza ko iyi Album igizwe n’indirimbo zifite
ubutumwa butandukanye, zireba ku buzima busanzwe, imibanire n’urugendo
rw’umuntu ushaka kugera ku nzozi ze.
Uyu muhanzi yatangiye kwiga umuziki akiri muto, aho yize
gucuranga piano afite imyaka 5, nyuma yaje no kwiga guitar afashijwe na se
wamushishikarizaga gukunda umuziki gakondo. Byatumye akunda cyane no gucuranga
injyana igezweho.
Bolingo Paccy asobanura ko kwiga mu ishuri ry’ubuhanzi rya
Nyundo byamuhaye ubumenyi buhagije mu gucuranga no kwandika indirimbo, aho yise
iri shuri “Mu Iremero n’Inyundo Icura Inganzo”, kuko ryamuhesheje ubushobozi
bwo kuba umunyamuziki w’umwuga.
Album “Inyenyeri” igaragaza neza urugendo rwa Bolingo Paccy
mu muziki, aho yihuza n’abahanzi bakomeye akubaka umuziki ufite injyana gakondo
n’igezweho icyarimwe, yongera gutuma ashimangira umwanya we mu ruhando
rw’abahanzi b’icyitegererezo mu Rwanda.
KANDA HANO UBASHE KUGURA NO KUMVA ALBUM ‘INYENYERI’ YA BOLINGO PACCY
Abahanzi bane, imbaraga imwe – Bolingo Paccy yahurije hamwe
King James, Mani Martin na Okkama mu ndirimbo zizahindura umwaka 2026
