Biteye kwibaza! Abahanzi batanu gusa mu Rwanda nibo bafite indirimbo zarengeje Miliyoni 10 kuri Youtube

Ariko nubwo isura y’umuziki igaragaza iterambere, imibare yo ku rubuga rwa YouTube itanga indi shusho ituma umuntu yibaza byinshi.

YouTube yabaye igipimo gikomeye mu kumenya uko igihangano cyakiriwe. Ni rwo rubuga rugaragaza umubare w’abarebye indirimbo, uko zikundwa, ndetse n’urwego umuhanzi ariho ku isoko mpuzamahanga –N’ubwo hari n’izindi mbuga zibigaragaza.

Mu bihugu bifite inganda z’umuziki zikomeye, kugira indirimbo zirengeje Miliyoni 10 ni ibintu bisanzwe; ariko mu Rwanda, iyo mibare iracyafatwa nk’igihango gikomeye cyane.

Igitangaje ni uko, mu muziki wa ‘Secular’ cyangwa umuziki w’Isi, kugeza ubu abahanzi batanu gusa ari bo bafite nibura indirimbo imwe cyangwa nyinshi zimaze kurebwa inshuro zirenga Miliyoni 10.

Ibi si ukubura impano cyangwa kudakora cyane, ahubwo ni imibare igaragaza aho isoko ryacu rigeze n’aho rikiri inyuma.

Hari igihe abantu bafata amazina amwe nk’aho ari yo nkingi za mwamba z’umuziki nyarwanda, bakavuga ko dufite “abahanzi babiri cyangwa batatu bakomeye cyane” kurusha abandi. Ariko iyo winjiye mu mibare ya YouTube, usanga ishusho itandukanye n’iyo mu bitekerezo bya benshi.

Hari abahanzi b’igisekuru gishya bafite indirimbo zarengeje Miliyoni 10, mu gihe hari n’abafatwa nk’ibihangange bafite indirimbo nke cyane zageze kuri uwo mubare.

Mu kiganiro aherutse kugirana na Isibo TV, Bugingo Bonny uzwi nka Junior Giti yavuze ko ushingiye ku mibare ya YouTube, “showbiz yacu ari nto cyane.”

Yagaragaje ko n’umubare w’abakurikira abahanzi “subscribers” ku miyoboro yabo ugaragaza ko isoko ry’umuziki w’u Rwanda rikiri rito ugereranyije n’ibihugu byo mu karere.

Iyi nkuru irasesengura uru rutonde rw’abahanzi batanu gusa  bazwi mu muziki usanzwe [Secular] bafite indirimbo zirengeje Miliyoni 10 kuri YouTube, ikerekana aho umuziki w’u Rwanda ugeze, aho ufite intege nke, ndetse n’icyizere kiri mu rugendo ruri imbere. Ni inkuru itanga imibare, ariko inatanga n’isomo ku miterere nyayo ya showbiz nyarwanda.

Meddy ni we uyoboye uru rutonde, aho afite indirimbo nyinshi zarengeje Miliyoni 10:

1.Slowly – Miliyoni 129

2.My Vow – Miliyoni 52

3.Queen of Sheba – Miliyoni 21

4.Holy Spirit – Miliyoni 17

5.Ntawamusimbura – Miliyoni 14

6.Nasara – Miliyoni 11

7.Lose Control: Miliyoni 15

Meddy ni we uza ku isonga mu bahanzi bafite indirimbo nyinshi zirengeje Miliyoni 10 kuri YouTube. “Slowly” yaciye agahigo ka Miliyoni 100, ikaba imwe mu ndirimbo zageze kure mu mateka y’umuziki nyarwanda.

Yiyongeraho “My Vow”, “Queen of Sheba”, “Holy Spirit”, “Ntawamusimbura” na “Nasara” –zose zerekana ko Meddy atari icyamamare cy’igihe gito.

By’umwihariko, Meddy yungukiye cyane ku kuba yarakoraga umuziki ari muri Leta Zunze Ubumwe za Amerika, aho yubatse isoko rikomeye muri diaspora.

Uretse imibare yo kuri YouTube, Meddy azwiho gukora ibitaramo byitabirwa cyane, no kubaka umwimerere mu njyana ya Afro-R&B yamuranze kuva akiri muto.

Kuba afite indirimbo nyinshi zifite ‘views’ nyinshi, bituma agaragara nk’umuhanzi wambutse imbibi z’u Rwanda mu buryo bufatika.

Ibi byerekana ko Meddy ari umwe mu bahanzi bake bashoboye kwambuka imipaka y’u Rwanda mu buryo bufatika, cyane cyane binyuze mu mbuga nkoranyambaga no ku isoko mpuzamahanga.

2. Chriss Eazy – Ijwi ry’Igisekuru gishya

1.Bana – Miliyoni 18

2.Jugumila – Miliyoni 14

3.Sekoma – Miliyoni 10

4.Inana – Miliyoni 10

Chriss Eazy ni umwe mu bahanzi bahagurukiye rimwe n’igisekuru gishya cyahinduye isura y’umuziki nyarwanda mu myaka ine ishize.

Indirimbo nka “Bana”, “Jugumila”, “Sekoma” na “Inana” zose zarengeje Miliyoni 10, zigaragaza imbaraga z’abakunzi b’umuziki we cyane cyane mu rubyiruko.

Uretse views, Chriss Eazy ni umwe mu bahanzi bafite abakurikira benshi ku rubuga rwa YouTube, ibintu bigaragaza ko afite umubare w’abafana uhamye.

Injyana ye yihariye, imvugo zoroshye kandi zifata amatwi, n’imbyino zigaragara mu mashusho bye byagize uruhare mu gutuma indirimbo ze zisangizwa cyane. Ni icyitegererezo cy’uko igisekuru gishya gishobora guhangana ku mibare n’abahanzi bakuru.

Ni umwe mu bahamya ko igisekuru gishya gifite imbaraga, kandi ko YouTube yabaye igipimo cyerekana impinduka mu buryo abantu bakira umuziki.

3. Element Eleeeh – Producer wahindutse icyamamare

1.Fou de toi – Miliyoni 30

2.Tombe – Miliyoni 14

3.Kashe – Miliyoni 14

Element Eleeeh yinjiye mu mitima ya benshi nk’utunganya indirimbo (producer), ariko aza no kwiyerekana nk’umuhanzi ufite ijwi n’umwimerere byihariye.

“Fou de toi” yarengeje Miliyoni 30, mu gihe “Tombe” na “Kashe” nazo zarenze Miliyoni 14 buri imwe. Ikintu kigaragaza imbaraga za Element ni uko atagarukira ku kwiririmba gusa, ahubwo ari mu batunganya indirimbo nyinshi zakunzwe mu Rwanda.

Kuba azi uburyo bwo kubyaza umusaruro ‘studio’ n’imvugo zigezweho byatumye abasha guhuza umusaruro mwiza n’uburyo bwo kuwugeza ku bantu. Ni umwe mu bahamya ko ‘Producer’ ashobora no kuba icyamamare imbere ku rubyiniro.

Ibi byerekana ko atari inyuma y’amaserukiramuco gusa, ahubwo n’imbere ku rubyiniro ari mu bafite imibare ifatika.

4. Bruce Melodie – Umwami w’ibitaramo, ariko imibare igaragaza iki?

1.Katerina – Miliyoni 15

Bruce Melodie afatwa nk’umwe mu bahanzi bafite izina rikomeye mu Rwanda no hanze yarwo. Indirimbo nka “Fou de toi” yakoranye na Element na Ross Kana, na “Katerina” zarengeje Miliyoni 10, zikaba ziri mu zimufashije gukomeza kwagura isoko rye.

Ariko nubwo izina rye rikomeye cyane mu bitaramo no mu bihembo, imibare ya YouTube igaragaza ko indirimbo ze zirengeje Miliyoni 10 atari nyinshi nk’uko bamwe babyibwira.

Ibi ntibivuze ko adakunzwe, ahubwo byerekana ko ubwamamare bwo mu gihugu bushobora gutandukana n’imibare yo ku mbuga mpuzamahanga.

Bruce Melodie akomeje kwagura ibikorwa bye no gukorana n’abahanzi bo mu karere, ibintu bishobora kongera imibare mu gihe kiri imbere.

5. The Ben – Icyubahiro cy’izina rikomeye

1.‘Why’ yakoranye na Diamond – Miliyoni 27

The Ben ni umwe mu bahanzi bafite amateka maremare mu muziki w’u Rwanda. Indirimbo ze nka “Why” na “Lose Control” zarengeje Miliyoni 10, zikomeza kuba mu zikunzwe cyane ku rubuga rwa YouTube.

Nubwo ari umwe mu bahanzi bafatwa nk’inkingi za mwamba mu muziki nyarwanda, imibare igaragaza ko indirimbo ze zirengeje Miliyoni 10 atari nyinshi cyane ugereranyije n’uko izina rye rifatwa.

Gusa, The Ben azwiho gukora ibitaramo bikomeye, gukorana n’abahanzi mpuzamahanga no kugira abakunzi benshi bamaze imyaka myinshi bamushyigikira. Ni umwe mu bahanzi bubatse izina rishingiye ku mateka n’icyizere cy’abamukunda, nubwo imibare ya YouTube itari myinshi cyane.

Nubwo ari mu bahanzi bafatwa nk’inkingi za mwamba mu muziki w’u Rwanda, imibare ya YouTube igaragaza ko indirimbo ze zirengeje Miliyoni 10 atari nyinshi nk’uko benshi babyibwira.

YouTube si urubuga rwo gushyiraho amashusho gusa; ni igikoresho gikomeye cyamamaza, gupima isoko no kwagura umwuga w’umuhanzi.

Mu gihe Radio na Televiziyo byahoze ari zo nzira nyamukuru zo kumenyekanisha indirimbo, uyu munsi YouTube yafashe umwanya wihariye mu gutuma igihangano kigera ku bantu benshi mu gihe gito.

YouTube ifasha umuhanzi kugera ku isoko mpuzamahanga. Indirimbo ishyizwe kuri uru rubuga ishobora kurebwa n’umuntu uri i Kigali, i Nairobi cyangwa i Paris icyarimwe.

Ibi biha umuhanzi amahirwe yo kurenga imbibi z’igihugu adategereje ibitaramo byo hanze cyangwa amasezerano n’ibigo bikomeye. Niyo mpamvu hari indirimbo nyinshi z’abahanzi nyarwanda zakunzwe cyane n’abari muri diaspora kurusha uko zakunzwe imbere mu gihugu.

YouTube ni urubuga rufasha kubaka izina (brand) y’umuhanzi. Uko indirimbo igenda igira views nyinshi, ni ko izina ry’umuhanzi rirushaho kumenyekana, n’ubwo harimo abagura ‘Views’.

Iyo umuntu ashaka kumenya urwego umuhanzi ariho, akenshi areba imibare ya YouTube: views, subscribers, comments n’uburyo indirimbo zisangizwa (shares). Iyi mibare iba nk’ikimenyetso cyerekana uko igihangano cyakiriwe ku rwego rwagutse.

YouTube ifasha mu kwamamaza no gukurura abafatanyabikorwa (sponsors). Ibigo byamamaza n’abaterankunga bareba cyane imibare y’abareba indirimbo mbere yo kugirana amasezerano n’umuhanzi.

Indirimbo ifite Miliyoni 10 cyangwa 20 z’abayirebye iba ifite agaciro kanini mu bucuruzi, kuko igaragaza ko umuhanzi afite abantu benshi bamukurikira kandi bumva ibyo akora.

YouTube itanga amafaranga binyuze mu iyamamazabikorwa (monetization). Nubwo mu Rwanda bitaragera ku rwego rwo hejuru nko mu bihugu bifite isoko rinini, views nyinshi zigira uruhare mu kwinjiza amafaranga atuma umuhanzi ashobora kongera gushora mu bihangano bye nko gukora amashusho meza, kwamamaza no kuzamura ireme ry’umusaruro.

YouTube ni igipimo cy’isoko. Indirimbo igera kuri Miliyoni 10 z’abayirebye iba yerekanye ko hari icyo yakoze ku bantu. Iyo indirimbo itabonye views nyinshi, nabyo bitanga ubutumwa ku muhanzi ku bijyanye n’imiterere y’isoko, uburyo bwo kwamamaza cyangwa injyana yakoresheje.

Muri rusange, YouTube yafashije abahanzi guhindura uburyo bamenyekanamo: ntibikiri ngombwa gutegereza Radio imwe cyangwa Televiziyo imwe; ahubwo igihangano gishyizwe kuri YouTube gishobora kugera ku bantu benshi kurusha uko byahoze.

Ariko kandi, imibare iri kuri uru rubuga inagaragaza ukuri kudashushanyije, aho umuhanzi ari, uko akundwa, n’urwego umuziki ugezeho ku isoko mpuzamahanga. Ni yo mpamvu ‘views’ zirengeje Miliyoni 10 zifatwa nk’ikimenyetso gikomeye mu muziki w’u Rwanda uyu munsi.

Meddy ni we uyoboye abandi mu muziki nyarwanda wa ‘Secular’, aho afite indirimbo 7 zarengeje Miliyoni 10 kuri YouTube, zirimo “Slowly” yaciye agahigo ka Miliyoni 100

Chriss Eazy ni umwe mu bahanzi b’igisekuru gishya bafite indirimbo enye zarengeje Miliyoni 10, zirimo “Bana” na “Jugumila”

Nubwo afatwa nk’umwe mu bahanzi bakomeye mu Rwanda, Bruce Melodie afite indirimbo nke zarengeje Miliyoni 10, zirimo “Katapila”

The Ben ari mu bahanzi batanu bafite indirimbo zirengeje Miliyoni 10, zirimo “Why” yakoranye na Diamond

Element Eleeeh, uzwi nka producer, yigaragaje no nk’umuhanzi, aho “Fou de toi” yarengeje Miliyoni 30 kuri YouTube

KANDA HANO UBASHE KUREBA AMASHUSHO Y'INDIRIMBO 'MY VOW'

KANDA HANO UBASHE KUREBA AMASHUSHO Y'INDIRIMBO 'SEKOMA'

KANDA HANO UBASHE KUREBA AMASHUSHO Y'INDIRIMBO 'KATERINA'

KANDA HANO UREBE AMASHUSHO Y'INDIRIMBO 'KASHE'

REBA HANO AMASHUSHO Y'INDIRIMBO 'WHY'