Mu mukino wari ukomeye, kuri uyu wa Kane tariki ya 12 Werurwe 2026 Rayon Sports yanganyije na Police FC 0-0 mu mukino ubanza wa 1/4 cy'Igikombe cy'Amahoro, wasize ikipe ya mbara ubururu n'umweru ivunikishijemo abakinnyi bayo bakomeye barimo; Emery Bayisenge, Mugisha Didier na Bigiraman Abedi.
Myugariro Emery Bayisenge yagize imvune ku munota wa 23' w'igice cya mbere nyuma yo gusunikwa na Ani Elijah ku mupira muremure wari utewe imbere na Nsabimana Eric 'Zidane' washaka Elijah.
Nyuma yo kugongana Emery yahise yerekana ko ababaye ndetse yifata ku itako nk'ugize imvune ndetse ahita aryama hasi inyuma y'ikibuga yitabwaho n'abaganga ba Rayon Sports ahita asimbuzwa Nshimiyimana Emmanuel 'Kabange'.
Abinyujije ku mbuga nkoranyambaga, Emery Bayisenge yatangaje ko nubwo yavunitse mu gihe cya vuba azagaruka mu kibuga kandi afite imbaraga zisumbuye ndetse ko azakomeza gushyigikira Rayon Sports mu bikorwa byose izakora.
Yagize ati: "Nzagaruka vuba kandi ndi umunyembaraga kurushaho. Kugeza icyo gihe, nzakomeza gushyigikira ikipe buri ntambwe yose izatera. Ndabashimiye ku butumwa muri kumpa bunyifuriza gukira vuba."
Ntagihindutse, biteganyijwe ko Emery Bayisenge acishwa mu cyuma mu rwego rwo kureba imvune yagize ndetse n'uburyo agomba kuvurwamo biturutse ku mvune basanze afite.
Iyo umukinnyi agize imvune ya 'Hamstring' harebwa ubwoko bw'imvune yagize kuko iri mu bice bitatu; Iya mbere ni ugukweduka kwa 'faber demange' twagereranya nk'imitsi yo mu mikaya; Kabiri, ni ugucika kw'imwe mu mitsi yo mu mikaya, gatatu, ni ugucika kw'imitsi yose yo mikiya yo mu itako.
Ubusanzwe umukinnyi runaka iyo yagize imvune yorohereje yo gukweduka kw'imitsi twavuze haruguru, amara iminsi 7 yitabwaho n'abaganga nyuma agasubira mu myitozo yoroheje hamwe n'abandi, iyo wagize imvune yo gucika kw'imwe mu mitsi umukinnyi amara iminsi iri hagati ya 14-21.
Iyo habayeho gucika kw'imitsi yose yo mu mikaya, umukinnyi amara hanze y'ikibuga hagati y'ibyumweru 3-4, gusa hari n'aho umukinnyi ashobora kumara hagati y'amezi atatu n'atandatu.
Byavugwaga ko Emery Bayisenge yari mu bakinnyi bazahamagarwa n'umutoza Stephen Constantine mu ikipe y'Igihugu (Amavubi) mu mikino ya FIFA Series itegerejwe muri Werurwe 2026 i Kigali.
Rayon Sports ivunikishije Emery Bayisenge, Mugisha Didier nawe wagize imvune ya 'hamstring' ndetse na Bigirimana Abedi ufite imvune ku kagombambari, irimo kwitegura imikino itatu ikomeye aho izahuramo na AL Merrikh, Police FC na Gasogi United mu Cyumweru gitaha.
Uko Emery Bayisenge yagonganye na Rutahizamu wa Police FC Ani Elijah
Emery Bayisenge yasohotse mu kibuga ababaye ndetse yifata ku itako yerekana ko yagize imvune
Abaganga ba Rayon Sports, Claude na Kubwimana Callixte baje kwita kuri Emery wari umaze kugira imvune
Abarimo Dr. Kubwimana Callixte basindagije Emery bamujyana ku ntebe y'abasimbura ya Rayon Sports kugira ngo bakomeze kumuvura
Nyuma y'umukino, Emery yasohotse acumbagira ari kumwe na Dr Kubwimana Callixte
REBA AMASHUSHO AGARAGAZA UKO EMERY BAYISENGE YAVUNITSE ASUNIKANYE NA ELIJAH