Bite iby’ubuhanuzi Bushali yahanuriwe na Prophet Akim ko azakorana indirimbo na Jason Derulo?

Ibi uyu mugabo yabihanuye ubwo bari live kuri TikTok aho Bushali akunze kuba ari amasaha menshi, amubwira ko Imana yahaye Bushali umugisha wo gukorana indirimbo na Jason Derulo n’ubwo Derulo ari umuhanzi ukomeye cyane kurenza Bushali.

Akimu yagize ati: “Ku wa Kabiri cyangwa ku wa Gatatu, Imana iguhaye umugisha wo kuzakorana n’umuhanzi mpuzamahanga mu mwuga wawe, witwa Jason Derulo. Ibi ubyandike”. 

Uwa Gatatu uvugwa muri ubu buhanuzi bwa Akim uri kubarizwa i Burayi nk'umunsi wa nyuma wo gukorana indirimbo hagati ya Bushali na Derulo, ni uyu munsi tariki ya 28 Mutarama 2026.

Nyuma yo kumva ubwo buhanuzi, Bushali yahise aza yidoga kuri Yampano n’ibitwenge byinshi amubwira ko n’ubwo batangira babikoresha ubwenge buhangano ariko birangira bibaye ukuri.

Ati: “Narakubwiye Wa Boy, ndakubwira nti niyo twatangira tubikora muri AI, bakaducishamo ijisho, bakaduseka ariko birangira amarembo afungutse.”

Ibi Akim yabivuze ubwo yari yakoranyije abantu kuri live ye ya TikTok muri 'Jeudi Service' yari ifite intego igira iti “Ugucungurwa/ukurokorwa kw’amaraso” ikaba yari yateguwe na Prophet Hulleman Akim.

Kuva ubwo buhanuzi bwaba, nta kanunu k’indirimbo ya Bushali na Jason Derulo ndetse nta biganiro bihari ku mpande zombi byaba bigamije imikoranire.

Akim wahanuye ibi, mu bihe byashize akiri mu Rwanda, yahanuriye Mama Sava ko azashakana na Papa Sava, na n'ubu ubukwe bwabo buracyategerejwe, gusa icyo gihe Mama Sava aganira na inyaRwanda yamaganiye kure iby'ubu buhanuzi.

Mu minsi ishize, Bushali yahanuriwe na Apotre Akim kuzakorana indirimbo na Jason Derulo

Nk'uko Apotre Akim abihanura, Jason Derulo agomba gukorana na Bushali bitarenze kuri uyu wa Gatatu