Biravugwa: Masudi Djuma yareze Rayon Sports ayishyuza miliyoni 58 Frw

Biravugwa ko Masudi Djuma kuri ubu uherereye muri Tanzania yamaze kugeza ibaruwa irega Rayon Sports muri FERWAFA aho yiteguye kuburana na Rayon Sports ashinja kumwirukana mu buryo bunyuranyije n’amategeko, akayishyuza miliyoni 58 Frw.

Masudi kuri ubu utoza Dodoma Jiji FC yo muri Tanzania, yirukanywe muri Rayon Sports muri Mutarama 2022 nyuma y’ukwezi yarahagaritswe kubera umusaruro mubi.

Nyuma yo kwirukanwa na Rayon Sports, Masudi yahise ahabwa akazi na Dodoma Jiji FC ikina mu cyiciro cya mbere muri Tanzania yagezemo muri Gashyantare 2022.

Kuri ubu amakuru akomeje gucicikana mu bitangazamakuru bitandukanye aravuga ko Masudi Djuma yamaze kurega Rayon Sports muri FERWAFA ayishyuza miliyoni 58 Frw kubera kumwirukana bihabanye n’amategeko.

 Nyuma yo kwitwara nabi mu mikino irindwi imaze gukinwa muri shampiyona y’u Rwanda 2021-22, Ku gicamunsi cyo ku wa Kabiri tariki ya 07 Ukuboza 2021, Rayon Sports yasohoye itangazo rivuga ko yamaze guhagarika umutoza mukuru Masudi Djuma kubera umusaruro mubi yagaragaje mu mikino irindwi iyi kipe yari imaze gukina muri uyu mwaka w’imikino. Uyu mutoza akaba yahagaritswe igihe kitazwi muri Rayon Sports.

Masudi yahagaritswe muri Rayon Sports amaze gukina imikino Irindwi muri shampiyona y’u Rwanda 2021-22, yatsinze imikino itatu, atsindwa ibiri ndetse ananganya imikino ibiri, yari ifite amanota 11/21.

Imikino itatu Rayon Sports yatsinze harimo uwa Mukura i Kigali, Bugesera i Kigali, na Etoile de l’Est i Kigali, mu mikino yanganyije harimo uwa Rutsiro i Rubavu na Espoir FC i Rusizi.

Rayon Sports yatsinzwe imikino ibiri yari ingenzi ku barayon, kuko ari imikino y’abakeba abafana baba bategerejeho ibyishimo, aho yabanje gutsindwa na APR FC nyuma yongera gutsindwa na Kiyovu Sports nayo imaze kuyigira insina ngufi muri iyi myaka ibiri ishize.

Gutsindwa na APR FC byazamuye umujinya w’abafana ba Rayon Sports idaheruka igikombe, bagaragaje akababaro kabo ndetse binavugwa ko banatoboye amapine y’imodoka y’umutoza Masudi Djuma.

Bidateye kabiri, Rayon Sports yongeye gutsindwa na mukeba wayo Kiyovu Sports ibitego 2-0, bishyira mu mwijima abakunzi b’iyi kipe batekereza kwegukana igikombe cya shampiyona uyu mwaka.

Uyu musaruro w’uyu mutoza w’umurundi utamaze igihe kirekire agarutse muri Rayon Sports, watumye buri ruhande ruhaguruka kugira ngo hashakwe umuti ugarura ikipe mu mujyo w’intsinzi.

Nyuma y’ukwezi kumwe ahagaritswe, Masudi yarirukanywe asimbuzwa umunya-Portugal Jorge Paxiao nawe kuri ubu bitarakundira muri iyi kipe.

Hategwerejwe kumenya uko uru rubanza rwa Masudi n’iyi kipe yakiniye akanayitoza uko ruzarangira.

Si ubwa mbere Rayon Sports yaba igiye mu manza iregwa n’abatoza bayitoje kuko yagiye iregwa kenshi ndetse ikanacibwa amafaranga izira kwirukana abakinnyi n’abatoza mu buryo butemewe n’amategeko.

Biravugwa ko Masudi Djuma yareze Rayon Sports ayishyuza miliyoni 58 Frw