Kimwe mu byatumye Kigali yigaragaza ni imikoreshereze y'indege nto zitagira abapilote (drones) za Zipline, zigeza amaraso n'ibikoresho by'ubuvuzi ku mavuriro mu gihe gito, zigafasha kurokora ubuzima bw'abarwayi.
Serivisi za Leta na zo zarushijeho koroshywa binyuze ku rubuga rwa Irembo rutangirwaho serivisi zirenga 100 zirimo gusaba ibyemezo by'amavuko, ibyangombwa by'ubutaka, pasiporo n'izindi, bigatuma abaturage batongera gutonda imirongo ku biro bya Leta.
Mu rwego rwo guteza imbere ubwikorezi, Kigali ikoresha ikarita ya Tap&Go, yorohereza abagenzi kwishyura ingendo za bisi mu buryo bw'ikoranabuhanga, bikihutisha serivisi kandi bikagabanya igihe cyo gutegereza.
Uyu mujyi kandi uri kwimakaza ikoreshwa rya moto zikoresha amashanyarazi, zisimbura buhoro buhoro izikoresha lisansi. Hari n'ahantu henshi hashyizweho serivisi zo gusimbuza batiri mu buryo bwihuse kugira ngo izi moto zikomeze gukora nta nkomyi.
Kigali kandi ikomeje kuba umwe mu mijyi isukuye kurusha indi muri Afurika, bitewe no kubuza ikoreshwa rya pulasitiki zitangirika no gukomeza gahunda ya Umuganda, ituma abaturage bagira uruhare mu isuku n'iterambere ry'umujyi.
Abasesenguzi bavuga ko Kigali igaragaza ko Afurika ishobora kubaka imijyi igezweho ishingiye ku ikoranabuhanga, idategereje kwigana ibihugu bikize ahubwo ikoresha ibisubizo bihuje n'ibikenewe n'abaturage bayo.