Ni umukino wa nyuma wabaye kuri iki cyumweru, tariki ya 28 Gashyantare 2016, kuri Sitade y'iguhugu cy'u Bwongereza ya Wembley, aho Liverpool yageze ku mukino wa nyuma isezereye Stoke City kuri penaliti 6-5 nyuma yo kunganya igitego 1-1 mu gihe Manchester City yo yari yasezereye Everton ku giteranyo cy’ibitego 4-3 muri 1/2.
Nyuma y’aho iminota 90 isanzwe irangiye amakipe yombi anganya ibitego igitego 1 kuri 1 byari byatsinzwe na Fernandinho ku mupira yari ahawe na Sergio Aguero ku ruhande rwa Manchester City mu gihe Liverpool yishyuriwe na Philip Coutinho.
Fernandinho yatsindiye Manchester City igitego cyiza acyishimira atya
Philipp Coutinho yishimira igitego yishyuriye Liverpool mu minota ya nyuma
Iminota 30 y’inyongera yarangiye amakipe yombi akinganya uusa ku busa maze irangiye hitabazwa za penaliti maze Manchester City itinda 3 kuri 1 nyuma y’aho abakinnyi batatu ba Liverpool bazihushirije zikuwemo n’umunyezamu Willy Caballero usanzwe ari uwa kabiri muri Manchester City, batatu ba Manchester City bakazinjiza.
Dore uko abakinnyi bateye penaliti.
Emre Can wa Liverpool yayiteye arayinjiza maze Fernandinho wari watsinze igitego cya Manchester City mu mukino hagati ayiteye arayihusha.
Lucas Leiva wa Liverpool yateye iya kabiri ikurwamo n’umunyezamu Caballero maze Jesus Navas wa Manchester City ayiteye arayinjiza.
Caballero yabanje gukuramo penaliti ya Lucas Leiva
Philipp Coutinho wa Liverpool iya gatatu arayihusha kuko na yo Caballero yaykuyemo maze Sergio Aguero yinjiza neza iya gatatu ya Mancester yari iya kabiri yinjiye.
Iya Coutinho wari wamutsinze igitego mu mukino hagati na yo yayikuyemo
Adam Lallana yateye iya kane Caballero arayifata maze Yaya Toure atera iya nyuma arayinjiza Liverpool itsindwa ityo.
Iya nyuma ya Adam Lallana, Caballero, umunya-Argentine w'imyaka 34 yayikuyemo igikombe gitaha i Manchester aho kuba mu mujyi wa Liverpool
Penaliti ya gatanu ntiyigeze iterwa kuko ntiyigeze iterwa kuko Manchester City yari imaze kwinjiza 3 na ho Liverpool yari yinjije penaliti 1, iya nyuma ikaba ntacyo yari kuyimarira.
Wilfred Bony yashyize Caballero ku rutugu amushimira ubutwari yagize agahesha Manchester City igikombe
Abakinnyi ba Manchester City bishimiye igikombe bishoboka ko ari cyo cyonyine bazatwara muri uyu mwaka w'imikino
Emmanuel Pellegrini (ibumoso) yahesheje Manchester City igikombe cya gatatu kuva yayigeramo mu gihe Jurgenn Klopp yabuze icya mbere yashoboraga guhesha Liverpool kuva mu mpera z'umwaka ushize avuye muri Dortmund
Abakunzi ba Manchester City bishimiye cyane gutwara Liverpool igikombe