Bien-Aimé yageze mu Rwanda avuga ibyishimo yagize nyuma yo guhura na Perezida Kagame

Uyu muhanzi wamenyekanye cyane mu itsinda rya Sauti Sol, yageze i Kigali kuri uyu wa Gatatu saa saba n’iminota 40 z’amanywa, aho biteganyijwe ko azasusurutsa abakunzi b’umukino wa Basketball mu birori bizajya biba hagati y’ibihe by’imikino (halftime shows), ashyira hamwe imbaraga z’umuziki n’iza siporo mu buryo budasanzwe.

Bien azaririmba ku wa gatanu tariki ya 22 Gicurasi 2026 ubwo iyi mikino ya nyuma ya BAL izaba iri kubera muri BK Arena.

Ntabwo ari ubwa mbere Bien-Aimé agaragaje ko akunda Basketball. Bien yakinnye Basketball igihe kirekire ubwo yari akiri mu mashuri yisumbuye ndetse ashimangira ko ari mu bahanzi bazi gukina Basketball, akabifashwamo n’indeshyo ye.

Mu ntangiriro z’uyu mwaka, uyu muhanzi yitabiriye umukino ya NBA All-Star Game 2026 muri Leta Zunze Ubumwe za Amerika, aho yanahuye na Perezida w’u Rwanda Paul Kagame.

Aha niho yahereye avuga ko yishimiye guhura na Perezida Kagame n’ubwo nta byinshi baganiriye ariko yaranyuzwe kuko amukunda, amureberaho kandi abona ko ari umuyobozi w’intangarugero.

Yagize ati: “Twabonanye akanya gato ntitwabona umwanya wo kuganira ibintu byinshi ariko buri gihe iyo mpuye na Perezida Kagame aba ari ibihe bidasanzwe kuri nge kuko mureberaho nk’umuyobozi mwiza kandi ndakeka ari umwe mu bayobozi muri Afurika barimo bateza imbere ubukungu na Siporo.”

Iyi mikino ya BAL igiye kubera mu Rwanda, izatangira hakinwa imikino ya kimwe cya kane (Quarterfinals), aho amakipe azahura mu buryo bukurikira: 

Petro de Luanda vs Dar City

Al Ahly vs ASC Ville de Dakar

RSSB Tigers vs FUS Rabat

Club Africain vs Al Ahly Ly

Bien yageze i Kigali yitabiriye imikino ya nyuma ya BAL igiye kubera BK Arena