Real Madrid ni imwe mu makipe ifite abakunzi benshi ku isi, aho imibare imwe n'imwe igaragaza ko ariyo kipe ifite abafana benshi ku isi. Urugero ugendeye ku mibare y'imbuga nkoranya mbaga usanga ariyo kipe ya mbere ikurikirwa kurusha izindi kuva umupira w'amaguru wabaho.
Iyi kipe ifite ibikombe 15 bya UEFA Champions League, ni imwe mu makipe menshi afite ijambo 'Real' mu izina ryayo. Bamwe bagakeka ko ari icyongereza, gusa icyo gitekerezo niba ukuri guca iburyo cyo gica ibumoso. Ntaho gihuriye n'ukuri pe.
Ijambo Real rivuze iki?
Ubundi iri jambo risangwa mu rurimi rw'icye-espanyol, niryo usanga mu cyongereza rivuga 'royal'. Muri make ni ijambo rikoreshwa ku bintu cyangwa abantu b'i bwami. Iyo uvuze 'royal family' uba uvuga umuryango w'umwami, n'ikindi kintu cyose wongeyeho 'royal' kiba kigomba kuba gifite aho gihuriye n'ubwami.
None kuki aya makipe yitwa Real? Ni ay'i bwami?
Igisubizo ni oya! Ntabwo aya makipe bisobanuye ko yashinzwe n'uvwami. Gusa nk'uko twabivuze haruguru ubwo agomba kugira aho aza guhurira n'ubwami kugira ngo ahabwe iryo zina rya Real ryiyongera ku mazina yayo asanzwe.
Aya makipe yashinzwe mu myaka imwe, imyaka ya 1900 ubwo umupira w'amaguru warimo ushinga imizi muri Espagne. Muri iki gihe Espagne yari iyobowe n'umwami Alfonso XIII. Muri iki gihe rero iyo ikipe yakirwaga i bwami ikemerwa mbese ikaba ibaye ikipe izwi i bwami, uyu mwami yahitaga yongera 'Real' ku mazina yayo.
Ikipe ya mbere yabimburiye izindi guhabwa 'Real' buriya si Real Madrid nk'uko bamwe babitekereza. Ahubwo ni iyo tuzi uyu munsi nka Espanyol, yigeze no kwitwa Espanyol Barcelona mu myaka ishize. Buriya amazina yayo yose yitwa Real Deportivo Espanyol Barcelona S.A.D, nubwo ikoresha izina rya Espanyol.
Nyuma haje Real Madrid ndetse n'andi makipe menshi yagiye arihabwa, ariho hava Real Sociedad, Real Betis, Real Valladolid, ndetse n'andi menshi.
Icyo aya makipe ahuriyeho usibye iri zina rya 'Real' nureba no mu birango byayo uzasanga yose afitemo ikamba ry'umwami, bigaragaza icyo kintu gisa n'igihango bagiranye n'ubwami bwa Espagne.
Real Madrid yo mbere yo guhabwa iri zina yabanje kwitwa Nueva Sociedad, iza guhindura izina yitwa Madrid Club Futbal. Nyuma Umwami Alfonso XIII nibwo yaje kuyiha ako kazina ka Real, ihita iba Real Madrid Club Futbal nk'uko izwi ubu.
Ikirango cya Real Madrid kigaragaramo ikamba nk'uko bimeze kuri ayo makipe yandi
