Kugeza ubu Benjamin White w'imyaka 26 y'amavuko, ni imwe mu ntwaro za Mikel Arteta, akoresha mu bwugarizi, haba mu mutima wa defanse n'inyuma iburyo. Muri 2021 ni bwo Ben White yageze muri Arsenal aguzwe miliyoni 50£. Avuye muri Brighton.
Myugariro Ben White, nawe ari mu bakinnyi bagize uruhare ngo Arsenal yongere gukandagira muri kimwe cya Kane cya UEFA Champions League, nyuma y'imyaka 14. Ibi babigezeho batsinze FC Porto yo muri Portugal.
Kongera amasezerano kwa Ben White, ni kimwe mu byashimishije umutoza wa Arsenal, Mikel Arteta. Mikel Arteta yagize ati "Ni amakuru aryoheye Arsenal, kumva ko tuzakomezanya na Ben White. Ni umukinnyi ukomeje kudufasha".
"Ni umukinnyi umanuka mu kibuga afite ishyaka ryo gutsinda, kandi buri munsi ahorana udushya mu kibuga. Imbaraga za Ben White, Zikomeje kudufasha muri byinshi turi kugeraho. Ni umukinnyi w'imico myiza, ndetse bagenzi be bose bamwiyumvamo".
Ben White waje muri Arsenal muri 2021 avuye muri Brighton, amaze gukinira Abarashi imikino 97 muri English Premier league, yayitsindiye ibitego bine.
Muri uyu mwaka w'imikino wa 2023-2024 English Premier League, Ben amaze gukinira Arsenal imikino 27 ndetse ubu ni bo bayoboye urutonde rwa shampiyoyona, nubwo banganya na Liverpool amanota, ariko bayirusha ibitego bazigamye.
Ben White yongereye amasezerano muri Arsenal y'umyaka ine
Ben White na bagenzi be bafashije Arsenal kuba iyoboye muri English Premier League
Ben White akina yugarira inyuma ku ruhande rw'iburyo no mu mutima wa defanse
Aha Ben White yari agiye kurengura umupira awugarura mu kibuga
