Ben na Chance ni itsinda ry'umugabo n'umugore rikora umuziki wo kuramya no guhimbaza Imana. Bakunzwe cyane mu ndirimbo ziyobowe na "Zaburi Yanjye" imaze kurebwa inshuro zirenga Miliyoni 5.9 kuri Youtube.
Aba baramyi batangaje ko bagiye gukora igitaramo cya Pasika, kizabera muri BK Arena - inyubako bagiye gutaramiramo bwa mbere mu gitaramo cyabo bwite. Ni igitaramo bise "Easter Jubilee Music Gathering" kizaba tariki ya 05 Mata 2026.
Mu butumwa bashyize ku rubuga rwabo rwa Instagram kuri uyu wa Kabiri tariki ya 10 Gashyantare 2026, Ben na Chance bagize bati:
“This Easter, something special is happening in Kigali [...]. Ugekereje mu kinyarwanda, bavuze ko "Kuri Pasika hazaba ikintu kidasanzwe muri Kigali.
Basobanuye ko iki gitaramo bise "Easter Jubilee" ari umunsi udasanzwe wo kwizihiza Pasika binyuze mu kuramya Imana no mu muziki wuzuye ibyishimo, bazahuriramo n’abakunzi babo muri BK Arena, ahantu bavuze ko ari “mu rugo” hashobora kwakira no guhuza abakunzi b’umuziki benshi icyarimwe. Bati: “Bwira inshuti yawe ibwire inshuti yayo”, banifuriza imigisha abazitabira.
Pastor Benjamin Serugo (Ben) yabwiye InyaRwanda ko igitekerezo cyo gutangira ibitaramo bya Pasika cyaje nyuma y’uko umuhanzi Patient Bizimana wari umaze igihe kinini abitegura, abihagaritse kubera kwimukira muri Leta Zunze Ubumwe za Amerika. Yavuze ko Imana yabishimye ko batangira uyu mushinga muri uyu mwaka, kandi ateguza ko bazajya bakora iki gitaramo buri mwaka.
Ku bijyanye n'ibitaramo bizenguruka Uburayi bateguje abakunzi babo birimo n'icyari kuzaba tariki ya 04 Mata 2026, Ben yavuze ko ibi bitaramo babyimuriye nyuma y'igitaramo cyabo cya Pasika bazakorera i Kigali, ibisobanuye ko bazajya i Burayi nyuma yo gusangira Pasika n'Abanyarwanda muri BK Arena.
Ntabwo ari Ben na Chance bonyine bakoze igitaramo kuri Pasika, kuko no mu 2025 Chryso Ndasingwa yaragikoze. Icyakora, Chryso yatangaje ko igitaramo cya Pasika atari umushinga agomba gukora buri mwaka, avuga ko undi muhanzi wese wifuza gutegura igitaramo kuri uwo munsi nta kibazo kirimo yazabikora.
Chryso Ndasingwa ukunzwe mu ndirimbo "Wahinduye ibihe", "Ni nziza" n'izindi, yavuze ko icyamushimisha cyane ari uko kuri buri Pasika hajya haba igitaramo, abakristo bagahurira hamwe bakaramya Imana bakanayihimbaza bizihiza Izuka rya Yesu Kristo. Yasabye abaramyi bose n'amatorero kubigira ibyabo. Ben na Chance babyumvise kabiri, bahita bategura iki gitaramo cya Pasika.
Ben na Chance bategerejwe muri BK Arena kuri Pasika, bamaze imyaka 10 batangiye kuririmbana nk’umugabo n’umugore dore ko indirimbo yabo ya mbere “Ririmbira Umwami”, yasohotse mu 2016. Icyo gihe InyaRwanda yabanditseho inkuru igira iti: “Couple ya Ben na Chance, abaririmbyi bakomeye ba Alarm Ministries, batangiye kuririmba ku giti cyabo.”
Ben na Chance babaye icyitegererezo ku bandi bahanzi ba Gospel, bituma nyuma yabo hagaragara andi ma-couple menshi aririmbana arimo James na Daniella, Papi Clever na Dorcas, René na Tracy, n’abandi. Kuri ubu, kuririmbana nk’umugabo n’umugore byabaye ibintu bisanzwe mu muziki wa Gospel.
Aba baramyi basanzwe banaririmba muri Alarm Ministries, ni abakristo bo muri CityLight Foursquare Church riyoborwa na Bishop Prof. Fidele Masengo. Chance avuga ko bazakomeza kuririmbana nka couple kuko biri mu muhamagaro n’iyerekwa Imana yabahaye ku rugo rwabo.
Ati: “Tuzakomeza kuririmba nka couple. Vision yacu ni ukubaka ubwami bw’Imana duhereye mu rugo rwacu, nk’uko Bibiliya ivuga iti: ‘Njye n’inzu yanjye tuzakorera Uwiteka’ (Yosuwa 24:15).”
Mu myaka 10 bamaze mu muziki nk’abashakanye, Ben na Chance bakunzwe mu ndirimbo nyinshi zirimo "Zaburi Yanjye", “Yesu Arakora”, “Amarira”, “Impano y’Ubuzima”, “Mu Nda y’Ingumba” n’izindi.
Igitaramo cyabo cya mbere mu mateka bagikoze ku wa 20 Gicurasi 2018 muri Kigali Serena Hotel, aho bamurikiraga album yabo ya mbere bise “Izina rya Yesu Rirakomeye.” Cyitabiriwe n’abarimo Aline Gahongayire, Bigizi Gentil (Kipenzi), Healing Worship Team, na Alarm Ministries.
Igitaramo cya Easter Jubilee bagiye gukorera muri BK Arena gitegerejwe na benshi nk’umunsi udasanzwe wo kuramya Imana, kwizihiza Pasika no guhurira mu byishimo by’umuziki wa Gospel. Ben na Chance batangaje ko andi makuru y'iki gitaramo bazayatangaza mu minsi iri imbere.
Ben na Chance bamaze imyaka 10 mu muziki bagiye gutaramira muri BK Arena kizaba kuri Pasika
Ben na Chance bateguje igitaramo cya Pasika mu nyubako ya BK Arena bise "Mu rugo"