Abo bamotari bavuga ko hari igihe basanga aho basimburiza batiri harimo umurongo muremure w'abategereje serivisi, bikabasaba kumara iminota myinshi cyangwa se amasaha bategereje. Bemeza ko muri icyo gihe baba bahagaritse akazi, bityo bakabura amafaranga bari kubona batwaye abakiliya.
Musabyimana Thierry, ni umwe mu bamotari bakorera mu Mujyi wa Kigali. Aganira na InyaRwanda, yavuze ko iyo batiri ishizemo umuriro mu masaha y'akazi ajya kuyisimbuza, ariko agasanga hari umurongo muremure w'abandi bamotari bategereje bateri zirimo umuriro. Avuga ko ibyo bituma amara igihe kinini ategereje, bikabangamira gahunda y'akazi ke.
Yagize ati: "Iyo batiri ishizemo umuriro njya kuyisimbuza, ariko nkahasanga umurongo muremure w'abamotari bategereje batiri zirimo umuriro. Rimwe na rimwe bimfata igihe kinini cyane ntegereje, kandi muri icyo gihe mba ntari gukora. Ibyo bituma ntakaza abakiliya n'amafaranga nari kubona, bikabangamira gahunda y'akazi kanjye ka buri munsi."
Bayavuge Vincent, ni umumotari ukorera mu Karere ka Muhanga, na we yavuze ko ikibazo cyo gutegereza batiri gihari. Avuga ko n'iyo ageze aho basimburiza batiri ari we ukurikiyeho, bimutwara igihe kinini mbere yo guhabwa indi batiri irimo umuriro, kandi akenshi ntiba yuzuye neza.
Yagize ati: "Iyo ngeze aho basimburiza batiri, n'iyo mba ari njye ukurikiyeho, umukiliya ntantegereza kuko nshobora kumara igihe kinini ntegereje batiri, agahitamo gushaka undi mumotari. Ikindi kibazo ni uko n'iyo batiri bayiduhaye, akenshi iba ituzuye neza, ku buryo ugera mu muhanda igahita ishiramo umuriro vuba."
Abamotari kandi basaba ko hongerwa umubare w'amasitasiyo asimburizwaho batiri ndetse n'umubare wa batiri ziboneka, kugira ngo bagabanye igihe bamara bategereje. Bavuga ko ibyo byafasha kongera umusaruro w'akazi kabo no gutuma serivisi baha abakiliya irushaho kwihuta.
Ndayisenga Wilson, umumotari ukorera i Kigali, yagize ati: "Twifuza ko hongerwa aho dusimburiza batiri kandi n'umubare wa batiri ziboneka ukiyongera, kuko igihe tumara dutegereje kidutakariza abakiliya n'amafaranga."
Ku rundi ruhande, bamwe mu bakoresha izi moto bavuga ko nubwo hari izi mbogamizi, gukoresha amashanyarazi bikomeje kubafasha kugabanya ikiguzi cy'imikorere ugereranyije na moto zikoresha lisansi. Basaba ko ibibazo bikiriho byakemurwa kugira ngo bunguke kurushaho.
Maniriho Jean Damour yagize ati: "Nubwo hari ikibazo cyo gutegereza batiri, moto zikoresha amashanyarazi zatumye amafaranga nakoreshaga ku rugendo agabanuka cyane ugereranyije na moto zikoresha lisansi. Icyo twifuza ni uko ibyo bibazo byakemurwa kugira ngo serivisi irusheho kwihuta kandi natwe twunguke kurushaho."
Icyakora, abamotari bashobora kuba bafite icyizere cy'uko ibi bibazo bizagenda bikemuka. Ku wa 24 Gashyantare 2026, Spiro yatangaje ko yabonye inguzanyo ya miliyoni 50 z'amadolari ya Amerika yatanzwe na Banki Nyafurika Itumiza n'Iyohereza Ibicuruzwa (Afreximbank).
Iyi nkunga igamije gufasha iki kigo kwagura amasitasiyo yo gusimburizaho batiri mu bihugu gikoreramo, kwinjira mu masoko mashya, guteza imbere ikoranabuhanga ryo gusimbuza batiri, kunoza uburyo bwihuse bwo kuzishyiramo umuriro no gukoresha ingufu zisubira.
Umuyobozi Mukuru wa Spiro, Kaushik Burman, yavuze ko icyifuzo cya serivisi z'iki kigo gikomeje kwiyongera, bikagaragaza impinduka zikomeje kuba mu rwego rw'ubwikorezi muri Afurika binyuze mu gukoresha moto z'amashanyarazi zangiza ibidukikije ku rugero ruto.
Nubwo Spiro yatangaje ko yabonye iyi nkunga igamije kwagura ibikorwa byayo no kunoza serivisi zo gusimbuza batiri, abamotari bavuga ko hakiri icyuho hagati y'ibyo biteze n'uko serivisi zibageraho buri munsi.
Bemeza ko ikibazo cy'igihe kinini bamara bategereje batiri kigikomeje kubagiraho ingaruka, bityo bagasaba ko ibikorwa byo kongera amasitasiyo no kongera ubushobozi bwa serivisi byihutishwa kugira ngo barusheho kongera umusaruro wabo.
