Ku mugoroba wo kuri uyu wa Kane tariki ya 08 Mutarama 2026, umunyamideli w'icyamamare Isimbi Vestine uzwi nka Isimbi Model yasangije abamukurikira ku rubuga rwa Instagram ubutumwa bwuje ishimwe n’ibyishimo bidasanzwe, nyuma yo kwibaruka umwana w’umukobwa wabonye izuba ku wa 01 Mutarama 2026, saa kumi n’imwe n’iminota 50 z’umugoroba (5:50 PM).
Aya makuru meza yaje ashimangira ubudahemuka bw’Imana nyuma y’urugendo rurerure rwo gutegereza urubyaro, kuko Isimbi n’umugabo we Shaul Hatzir bakoze ubukwe mu mwaka wa 2022. Uyu mwana ni ubuheta bwa Isimbi Vestine, akaba ari imfura ya Shaul Hatzir n’uyu mugore w'izina rikomeye mu myidagaduro nyarwanda.
Mu butumwa bwe, Isimbi yanditse amagambo yuje ukwizera n’ishimwe agira ati: “God Did It Again" [Imana yarabikoze nanone], ahita ashyiraho umurongo wo muri Bibiliya wo mu 1 Samweli 1:27 ugira uti: “Uyu mwana ni we nasabye kandi Uwiteka yampaye icyo namusabye.”
Isimbi, umunyamideli ukomeye akaba n'umukristo muri Women Foundation Ministries na Noble Family Church, yakomeje agaragaza ko uyu mwana ari igice cyari kibuze mu buzima bwabo, amwita mu ndimi z'amahanga “the missing piece to our puzzles”, agaragaza ko nubwo urugendo rwo gutegereza rwari rurerure, Imana yongeye kwiyereka ko ari indahemuka.
Yashimiye by’umwihariko abantu bose bababaye hafi muri urwo rugendo, babasengera ndetse babatera imbaraga. Yashimiye cyane umugabo we Shaul Hatzir, amwita Umwami we, amushimira urukundo, kwihangana no kumuba hafi mu gihe cyose cyo gutegereza.
Yavuze ko atigeze amushyira ku gitutu, ahubwo yamuhumurizaga akamubwira ati “Baby relax, it will happen when you least expect it [Mugore wanjye humura, bizaba igihe utabyiteze].” Isimbi yagaragaje ko aya magambo yabaye impamo, anavuga ko iyo aza kubimenya atari kurira cyane.
Isimbi yashyize hanze amafoto agaragaza ibyishimo byabo, ashimira Imana ati: “Turagushimiye Mana.” Yanagaragaje ko inshuti n’abavandimwe batandukanye batangiye kumusura, barimo na Umukundwa Clemence uzwi nka Cadette, wasangije ubutumwa bw’ishimwe ku mbuga nkoranyambaga.
Mbere yo kwibaruka, Isimbi yari yarasangije abamukurikira amagambo yo muri Yeremiya 1:12 agira ati: “Maze Uwiteka arambwira ati 'Waroye neza, kuko ndinda ijambo ryanjye kugira ngo ndisohoze,” ayaherekeza amafoto agaragaza ko yari atwite, ibintu byagaragazaga ukwizera gukomeye yari afitiye Imana.
Isimbi Model na Shaul Hatzir basezeranye imbere y’amategeko mu 2021, basezerana imbere y'Imana ku wa 20 Gashyantare 2022 mu birori byabereye muri Kigali Convention Centre, ndetse no muri Radisson Blu Hotel mu Mujyi wa Kigali.
Urukundo rwabo rwahereye mu 2018, aho bahuriye bwa mbere kuri Kigali Convention Centre, bagenda bamenyana buhoro buhoro kugeza bafashe icyemezo cyo kubana no kubaka umuryango. Muri 2021 ni bwo baguze inzu yabo bwite muri Kigali.
Isimbi azwi cyane mu mwuga wo kumurika imideli no kwamamaza binyuze mu mafoto, aho yagaragaye no mu bitaramo bitandukanye by'imideli birimo Collective RW Week of Fashion. Yanagaragaye mu mashusho y’indirimbo “Closer”ya Meddy, Uncle Austin na Yvan Buravan.
Yigeze gutangaza ko Shaul Hatzir ari we yasabye Imana, kuko yujuje hafi byose yifuzaga ku mugabo w’inzozi ze. Isimbi avuga ko umugabo yasabye Imana ari we yamuhaye kuko Shaul Hatzir yujuje 98% by’ibigize umugabo yahoraga asaba Imana.
Uyu munsi, Isimbi Model n’umugabo we bari mu byishimo bidasanzwe byo kwakira umwana wabo w’umukobwa, batangiza igice gishya cy’ubuzima bwabo cyuzuye urukundo, ishimwe n’icyizere cy’ejo hazaza h’umuryango wabo.
Isimbi na Shaul bahora mu Ijuru ryabo rito. Shaul Hatzir avuga ko kuba yarasanze Isimbi afite umwana w’umuhungu ntacyo bimutwaye ndetse uwo mwana amufata nk’uwe kandi ajya avugana na se w’uwo mwana babanye neza.
Ati: “Ni umusore mwiza, twarahuye turaganira , nta kibazo dufitanye kuko ni iby’agaciro cyane ku mwana kumenya se wamubyaye , ni byiza mu buzima kandi turabyishimira, uko bakomeza kuvugana ni ko natwe bitugendekera neza, nishimira ko ari mu buzimwa bwe.”
Mu mashimwe Isimbi Model yagize ati: "Uyu mwana ni we nasabye kandi Uwiteka yampaye icyo namusabye".
Barishimye cyane kuko Imana yumvise gusenga kwabo ikabaha umwana w'umukobwa
Shaul Hatzir yishimiye cyane imfura ye na Isimbi Model
Isimbi Model yavuze ko Imana yamuhaye umwana yayisabye
Amashimwe ni yose mu muryango wa Isimbi Model
Ubwo Isimbi Model yari akuriwe yitegura ubuheta bwe akaba n'imfura ye na Shaul
Uko umuryango wa Isimbi Model wizihije Noheli y'umwaka wa 2025
Mu mwaka wa 2024, Isimbi yahawe impano y'imodoka ihenze n'umugabo we Shaul Hatzir
Bari bamaze imyaka 4 bategereje imfura yabo, none Imana yumvise gusenga kwabo ibaha umwana w'umukobwa
Isimbi na Shaul bakoze ubukwe mu 2022 nyuma y'imyaka 4 bari bamaze bamenyanye
Urugo rwabo ruhoramo umunezero, ibintu buri umwe muri bo ashingiraho yita mugenzi we 'impano y'Imana'
Isimbi Model ni umunyamudeli ukomeye mu Rwanda