Mu minsi ishize, ibihumbi n'ibihumbi by'abimukira byambutse umupaka uhuza Maroc na Ceuta, benshi banyuze mu nyanja bashaka kugera ku butaka bwa Espagne ndetse hari abantu benshi bahasize ubuzima muri uru rugendo rwari rwuzuyemo ibyago.
Umuyobozi wa Ceuta, Juan Jesus Vivas, yabwiye Inteko Ishinga Amategeko y'u Burayi ko hagati y'abimukira 3,000 na 5,000 bagikomeje kuba muri ako gace. Yanagaragaje agahinda gakomeye aterwa n'uko abantu bagera ku 100 bapfuye bagerageza kwambuka inyanja.
Mu itangazo Barcelona yashyize hanze, iyi kipe yatangaje ko itazajya muri Maroc gukina umukino wa gicuti yari ifitanye na IR Tangier, wari uteganyijwe ku wa 15 Kanama 2026.
Barcelona yagize iti: "Dushingiye ku buryo ibintu bihagaze muri iki gihe no ku kutamenya neza uko bizagenda, twabonye ko atari igihe gikwiye cyo gukina uyu mukino."
Uyu mukino wari kuba umwe mu yafashaga ikipe ya Hansi Flick gukomeza imyiteguro y'umwaka w'imikino mushya nyuma yo kwegukana igikombe cya La Liga.
Mbere y'ibi, yari ifite undi mukino wa gicuti wagombaga kuyihuza na Preston North End yo mu cyiciro cya kabiri mu Bwongereza, ariko nawo warasubitswe.
Amakuru yatangajwe na The Athletic yavuze ko Preston yabwiye Barcelona ko idafite abakinnyi bahagije b'ikipe ya mbere.
Kubera iyo mpamvu, Barcelona yahisemo gukinisha amakipe abiri agizwe n'abakinnyi bayo, umukino urangira banganyije 1-1, ibitego bitsindwa na Fermín López na Xavi Espart.
Barcelona isubitse umukino wa gicuti yari gukinira muri Maroc kubera ikibazo gikomeye cy'abimukira