Banki Nkuru y'u Bwongereza yatangaje ko guhera mu Ukwakira 2026 itazongera kwakira impapuro z'agaciro z'ibigo byinjiza amafaranga mu bucukuzi bw'amakara akoreshwa mu gutanga amashanyarazi, nk'ingwate iyo amabanki y'ubucuruzi ayisabye inguzanyo.
Mu busanzwe, amabanki akomeye nka Barclays, HSBC, Lloyds na NatWest ashobora kugurizwa amafaranga na Banki Nkuru kugira ngo akomeze gukora neza ibikorwa byayo bya buri munsi.
Mbere yo guhabwa ayo mafaranga, asabwa gutanga impapuro z'agaciro nk'ingwate. Icyakora, izifitanye isano n'inganda z'amakara ntizizongera kwemerwa.
Banki Nkuru y'u Bwongereza ivuga ko yafashe iki cyemezo kubera ko ibikorwa bishingiye ku makara bishobora gutakaza agaciro uko Isi igenda yimukira ku gukoresha ingufu zisukuye. Ibyo bishobora gushyira mu kaga umutekano w'umutungo wayo n'urwego rw'imari muri rusange.
Abaharanira kurengera ibidukikije bakiriye neza iki cyemezo, bavuga ko gitanga ubutumwa bukomeye ku masoko y'imari ko ishoramari rishingiye ku makara rigenda rirushaho gufatwa nk'irifite ibyago byinshi.
Banagaragaza ko bishobora gutuma ibigo byinshi by'imari bigabanya cyangwa bihagarika gushora imari muri uru rwego.
Nubwo bimeze bityo, bamwe mu bahanga bavuga ko hakiri urugendo, kuko bifuza ko izo ngamba zakwagurirwa no ku zindi nganda zangiza ibidukikije, zirimo n'ibikomeje kwagura ibikorwa bya peteroli na gaz ndetse n'ibyangiza amashyamba.
Iki cyemezo gituma Banki Nkuru y'u Bwongereza iba imwe mu mabanki akomeye ku Isi afashe ingamba zikomeye kurusha izindi mu guhuza politiki z'imari no guhangana n'ingaruka z'imihindagurikire y'ikirere.
Icyemezo cya Bank of England kigaragaza ko ibibazo by'imihindagurikire y'ikirere bitakiri iby'ibidukikije gusa, ahubwo bimaze no kuba ikibazo cy'umutekano w'urwego rw'imari.
Guhagarika kwakira impapuro z'agaciro zifitanye isano n'amakara bishobora gutuma ibigo by'imari birushaho gushora imari mu mishinga ishyigikira ingufu zisukuye no kugabanya ibyago by'igihe kirekire.