Bamporiki yasabye Ambassadors of Christ kujya iganuza abakunzi bayo buri mwaka - VIDEO

Mu ijoro ryuzuyemo umuziki w’ivugabutumwa, ibyishimo n’amarangamutima, Korali Ambassadors of Christ yanyuze abitabiriye igitaramo cyabereye muri BK Arena tariki 30 Kanama 2026, hizihizwa imyaka 30 iyi Korali imaze mu murimo w'Imana.

Muri abo bagera ku bihumbi icumi bitabiriye iki gitaramo, harimo Bamporiki Edouard, wabaye Umunyamabanga wa Leta muri Minisiteri y’Urubyiruko n’Iterambere ry’Ubuhanzi, na we wagaragaje ko yanyuzwe n’umwuka wacyo ndetse n’umusaruro wacyo ku bakunzi b’umuziki uhimbaza Imana.

Iki gitaramo cyari gifite umwihariko ukomeye ku mpamvu nyinshi. Cyabaye mu rwego rwo kwizihiza imyaka 30 Ambassadors of Christ imaze ikora umurimo w’ivugabutumwa binyuze mu ndirimbo, ndetse cyanitabiriwe ku rwego rugaragaza ubukana bw’urukundo Abanyarwanda bafitiye iyi Korali.

Ikindi cyaranze iri joro ni uko amatike yose yari yashyizwe ku isoko yashize, bigaragaza ko Ambassadors of Christ ifite abakunzi benshi bakomeje gukurikira no gushyigikira umurimo wayo.

Nyuma yo kwitabira iki gitaramo, Bamporiki yanyujije ubutumwa ku rubuga rwa X, ashimira Ambassadors of Christ ku byo yabagejejeho, anagira inama iyi Korali kujya ikora igitaramo nk’iki buri mwaka.

Yifashishije ijambo “umuganura”, risobanura umusaruro cyangwa igikorwa cyo gusangira no gushimira ku musaruro wabonetse, Bamporiki yagereranyije iki gitaramo n’umuganura w’imbuto z’imyaka 30 Ambassadors of Christ imaze mu ivugabutumwa.

Ati: “Mwishyuke Korali Ambassadors of Christ muduhaye umuganura wera ku mpera z'ukwezi kwawo. Ndasabye uko umwaka utashye (Kanama) mujye mutuganuza mutya.”

Muri ubu butumwa, Bamporiki yashimye ko iyi Korali yabahaye umwanya wo kwishimira ibyo imaze kugeraho, ariko anifuza ko iki gikorwa cyaba umuco ngarukamwaka, cyane cyane mu kwezi kwa Kanama.

Yongeyeho ati: “Umwami w'Ijuru ahimbazwe we waduhereye Umutware ubugiri bwo kurwunamurana umuganura kandi ajye ahora abaganuza namwe mumwiture kutuganuza uku.”

Ubutumwa bwa Bamporiki bwagaragaje ko atarebye iki gitaramo nk’igikorwa cy’imyidagaduro gusa, ahubwo yakibonye nk’umusaruro w’imyaka 30 y’akazi ko kwamamaza ubutumwa bw’Imana binyuze mu ndirimbo.

Ambassadors of Christ ni imwe muri Korali zizwi cyane mu Rwanda, cyane cyane mu muziki w’ivugabutumwa. Mu myaka 30 ishize, yakoze ibihangano byinshi byagiye bikundwa n’abakristo ndetse n’abandi bakurikira umuziki nyarwanda.

Igitaramo cyo muri BK Arena cyabaye umwanya wo kwizihiza urugendo rurerure iyi Korali imaze, ariko nanone kiba umwanya wo guhuriza hamwe abakunzi bayo, abahanzi n’abandi banyuranye basanzwe bashyigikira umurimo w’ivugabutumwa ikora.

Kuba amatike yose yarashize ku isoko, kandi abantu ibihumbi bakitabira igitaramo, byongeye kugaragaza ko umuziki w’ivugabutumwa ukomeje kugira umwanya ukomeye mu myidagaduro nyarwanda.

Ni muri urwo rwego Bamporiki yifuza ko Ambassadors of Christ itarekera aha, ahubwo ikajya yongera igategura igitaramo nk’iki buri mwaka, bityo buri Kanama ukaba umwanya wo “kuganuza” Abanyarwanda umusaruro mushya w’ivugabutumwa n’umuziki.

Ku ruhande rwa Ambassadors of Christ, iki gitaramo cyabaye umusozo ukomeye w’ibirori byo kwizihiza imyaka 30 imaze ikorera mu murimo w’ivugabutumwa, mu gihe ku bitabiriye cyo cyabaye ijoro ryo kuririmba, guhimbaza Imana no kwishimira urugendo rw’imyaka itatu icumi iyi Korali imaze.

Uhereye ibumoso: Scovia Mutesi washinze Mama Urwagasabo TV, Bamporiki Edouard n’umugore we bitabiriye igitaramo cya Korali Ambassadors of Christ

Korali Ambassadors of Christ yakoze igitaramo gikomeye mu rwego rwo kwizihiza imyaka 30 ishize bari mu ivugabutumwa

Sarah Sanyu wamamaye muri Ambassadors of Christ, ari kumwe na Ssozi Joram, usanzwe ari Umutoza n'Umwanditsi w’indirimbo muri Ambassadors of Christ

Ambassadors of Christ Choir bakoze igitaramo cy'amateka, amatike yose aracuruzwa arashira (Sold Out)

Edouard Bamporiki yasabye Ambassadors of Christ kujya iganuza abakunzi bayo buri mwaka