Uyu mukinnyi ukomoka muri
Portugal yegukanye iki gihembo nyuma yo gutsinda abandi bakinnyi bakomeye
barimo Lionel Messi, wari ku mwanya wa kabiri binyuze mu mwaka wa 2012, mu gihe
Ballon d’Or ya 2017 ya Ronaldo yaje ku mwanya wa gatatu.
Ibyavuye muri aya matora
byashyizwe ahagaragara nyuma y’itora ryari rigamije kumenya umwaka wihariye wa
Ballon d’Or abakunzi b’umupira w’amaguru babona ko wari ukomeye kurusha indi
yose.
Nk’uko byatangajwe na
Manchester United, ikipe Ronaldo yakiniraga mu mwaka wa 2008, uyu
Munya-Portugal yatsinze ibitego 42 mu marushanwa yose mu mwaka w’imikino wa
2007/08, afasha iyi kipe kwegukana ibikombe bibiri bikomeye birimo Premier
League na UEFA Champions League.
Uyu musaruro wamufashije kwegukana Ballon d’Or ye ya mbere mu 2008, icyo gihe akaba yari afite imyaka 23. Yari umwe mu bakinnyi bakomeye cyane muri uwo mwaka, agaragaza ubushobozi bwo gutsinda ibitego, kwihuta, gucenga no gufasha ikipe ye kugera ku ntsinzi.
Ronaldo imbere ya Messi
mu bihe byabo by’ikirenga
Mu rutonde rw’abakinnyi
32 n’imyaka yabo yatowe muri aya matora, Ronaldo wa 2008 ni we waje ku mwanya
wa mbere, akurikirwa na Messi wa 2012. Ronaldo wa 2017 yaje ku mwanya wa
gatatu, Messi wa 2023 aba uwa kane, mu gihe Ronaldo wa 2016 yaje ku mwanya wa
gatanu.
Ibi bigaragaza ko imyaka
myiza ya Ronaldo na Messi yihariye muri aya matora, kuko ari bo bakinnyi
bigaruriye imyanya 12 ya mbere. Ronaldo afite imyanya itanu muri 10 ya mbere,
kimwe na Messi, mu gihe Ronaldo Nazário wo muri Brazil ari we mukinnyi wabakurikiye,
aza ku mwanya wa 13 binyuze mu mwaka wa 2002.
Mu bandi bakinnyi b’ibihangange bagaragaye muri uru rutonde harimo Kevin Keegan, Johan Cruyff, Michel Platini, Franz Beckenbauer, Marco van Basten, Alfredo Di Stéfano na Karl-Heinz Rummenigge, bose bagize uruhare rukomeye mu mateka ya Ballon d’Or.
Ibihembo byiyongera ku
mateka ya Cristiano Ronaldo
Ronaldo, yegukanye Ballon
d’Or inshuro eshanu mu buzima bwe, akomeje kugereranywa na Messi, ufite
umunani, mu biganiro by’abakunzi b’umupira w’amaguru ku bakinnyi bagize amateka
akomeye kurusha abandi.
Icyakora, ni ngombwa
gutandukanya iki gihembo cya BOAT na Ballon d’Or isanzwe. BOAT yari itora
ryihariye ryahaga abakunzi b’umupira w’amaguru amahirwe yo guhitamo umwaka
w’umukinnyi wegukanye Ballon d’Or babona ko wari ukomeye kurusha indi, aho
gutanga igihembo gisanzwe gihabwa umukinnyi witwaye neza muri uwo mwaka.
Nk’uko byatangajwe,
abitabiriye itora bishyuraga Iyero 1 kugira ngo batore, kandi amajwi yabo ni yo
yagennye urutonde rwashyizwe ahagaragara.
Kwegukana uyu mwanya kwa
Ronaldo wa 2008 byongeye kugaragaza agaciro abakunzi benshi ba ruhago baha
umusaruro yatanze muri Manchester United, aho yafashije iyi kipe kwegukana
ibikombe bikomeye kandi akegukana Ballon d’Or ye ya mbere.
Nubwo impaka ku mukinnyi ukomeye kurusha abandi mu mateka ya ruhago zizakomeza, amajwi y’abitabiriye iri tora barenga 5 000 yashyize Ronaldo wa 2008 imbere y’abandi bose bari bahatanye muri iri rushanwa ryihariye.