Bakorana na Diamond! Abanyabigwi Nusder na Hunter ku isoko ry’u

Music Bizz ni urubuga ruzajya rutangirwamo ubumenyi, ubufasha n’ubujyanama nkenerwa mu muziki bikozwe mu byiciro bitandukanye aho hazajya hafatwa abahanzi bacye bagafashwa mu gihe runaka.

Abatunganya umuziki bagera ku 8 barimo batanu bo mu Rwanda ndetse n’abatatu bo mu bihugu byo hanze ndetse bamaze kugwiza ibigwi, bamaze kwemera kwinjira muri iyi gahunda.

Mu kiganiro na InyaRwanda, umuyobozi wa Music Bizz, Logic Hit It yavuze ko ari umuntu ukunda umuziki n’ubuhanzi muri rusange bityo ko hamwe n’abandi bari gukorana bifuje gukomeza gutanga umusanzu mu muziki nyarwanda mu buryo mpuzamahanga.

Logic Hit It agaragaza ko hari ibyo bakoze mbere byabahaye ubumenyi bw’uburyo iyi gahunda ikwiriye gukora, igatanga umusanzu nko guhuza aba Producer bo mu ngeri zitandukanye mu muziki.

Kwiyandikisha muri iyi gahunda birakomeje binyuze ku rubuga rwa mbmusibizz.co Mu bemeye kujya muri iyi gahunda kugeza ubu, harimo Nusder Venom umaze imyaka isaga 10 ari mu b’imbere batunganya bakayungurura umuziki neza.

Mu bahanzi bamaze gukorana na Nusder harimo Mbosso bakorana bya hafi mu bikorwa by’uyu muhanzi bya buri munsi hakaza kandi Zuchu, Rayvanny na Diamond Platnumz.

Hunter na we wo muri Tanzania wagiye wegukana ibihembo bitandukanye muri Africa nka Producer mwiza, akaba yarakoreye abahanzi bakomeye ku mugabane wa Africa harimo ‘Uno’ na ‘Bedroom’ za Harmonize, ‘Zol Ta Mangar’ ya John Frog na Rayvanny, ‘Wife’ ya Eddy Kenzo na Lady Jaydee, ‘Mumbejja’ ya Jose Chameleone.

Haza kandi King Nachi Beats wamaze gushing imizi mu gutunganya umuziki anafite inzu ifasha abahanzi izwi nka KNB Recordz ifasha abahanzi bakiri bato kubona urubuga rwo kuzamuriramo impano zabo.

Mu ndirimbo zatunganijwe na King Nachi harimo ‘I love you’ ya Towela Kaira na Chile One, ‘Benjamins’ ya 76 Drums, ‘One Day’ ya Jemax na Yo Maps n’izindi zitandukanye.

Uretse kuyobora iyi gahunda, Umuyobozi wa Music Bizz, Logic Hit It azagira uruhare mu gutunganya no gutanga ubumenyi ku bahanzi bazitabira iyi gahunda haherewe ku bato.

Mu birebana no gutunganya umuziki Logic Hit It yakoze indirimbo zirimo ‘Uzakunde’ ya Yampano, ‘Wane’ ya Yago na Inyogoye, ‘Inyange’ ya Diplomat, ‘Dore Intwari’ ya B Threy, ‘Amor’ ya Ish Kevin na Igor Mabano n’izindi zitandukanye.

Genius wo mu Rwanda uri mu bahanga mu birebana n’umuziki, ari mu bazagira uruhare muri iyi gahunda ya Music Bizz. Uyu mugabo amaze imyaka isaga 8 atunganya imiziki akaba yarakoranye n’abahanzi banyuranye.

Mu ndirimbo yatunganije harimo ‘Jehova’ ya Chiboo, ‘Vuba’ ya B threy, ‘Mundeke’ ya Fela Music, ‘Sitaki’ ya Papa Cyangwe yanagize uruhare mu ikorwa ry’indirimbo y’ikimenyabose yiswe ‘Kamwe All Star’.

Bertz Beats na we ari mu bazatanga umusanzu muri iyi gahunda yamaze gushinga imizi mu gutunganya umuziki cyane gukora Afrofusion. Imwe mu ndirimbo yatangunije zabaye ikimenyabose ni ‘Ngo’ ya Yampano na Papa Cyangwe.

Youngest AY umaze guterwa ijisho n’abahanzi bafite izina riremereye cyane mu njyana ya Hip Hop nka B Threy, uretse kandi gutunganya amajwi afite n’ubuhanga mu gutunganya amashusho, akaba nawe azagira uruhare muri Music Bizz.

Minutes Pro Beats uhuza gutunganya umuziki no kuririmba, yakoze indirimbo zitandukanye zirimo ‘Kinyatrapa’ ya B Threy kimwe na ‘Burijoro’ ya Fizzo Mason, Jay C na Mirror.

Umuhanzi wifuza kwitabira iyi gahunda asabwa kunyura ku rubuga rwa www.mbmusicbizz.com akabasha kwiyandikisha. Iyi gahunda izafasha abahanzi kunguka ubumenyi, gukorerwa indirimbo z’amajwi n’amashusho, gufashwa gutegura ibitaramo no kugirana umubano n’abatunganya umuziki yaba abo mu Rwanda no hanze yarwo.