Uru rugendoshuri rwabaye kuri uyu wa Kane, tariki ya 25 Kamena 2026, rwitabiriwe n’abanyeshuri bagize icyiciro cya gatatu cy’ayo mahugurwa, arimo abapolisi 196 bo ku rwego rwa ba Ofisiye bato n’abakozi 10 bo mu Rwego rw’Igihugu rw’Ubugenzacyaha (RIB).
Bose ni Abanyarwanda kandi bari mu mahugurwa azamara amezi atatu agamije kubongerera ubumenyi mu buyobozi bwa sitasiyo za Polisi (Police Station Command Course).
Nk’uko byatangajwe na Polisi y’u Rwanda, abitabiriye uru rugendo basuye ahantu hatandukanye hafite amateka n’akamaro gakomeye mu miyoborere n’umutekano w’igihugu.
Mu hantu basuye harimo Urwibutso rwa Jenoside yakorewe Abatutsi rwa Kigali ku Gisozi, Ingoro Ndangamurage y’Amateka y’Urugamba rwo Guhagarika Jenoside iri ku Kimihurura, ndetse n’Ishami rya Polisi rishinzwe Ikoranabuhanga n’Igenzura ry’Umutekano (Command and Coordination Center).
Bageze ku Rwibutso rwa Jenoside rwa Kigali, basobanuriwe amateka yaranze u Rwanda mbere y’ubukoloni, uburyo Abanyarwanda babanaga mu bumwe mbere y’uko abakoloni bazana politiki yo kubacamo ibice ishingiye ku moko, ndetse n’uko iyo politiki yagejeje igihugu kuri Jenoside yakorewe Abatutsi mu 1994.
Basobanuriwe kandi ingaruka Jenoside yasize ku gihugu n’impamvu gukomeza kwibuka no kurwanya ingengabitekerezo ya Jenoside ari inshingano za buri Munyarwanda, by’umwihariko abakora mu nzego z’umutekano n’izubahiriza amategeko.
Ku Ngoro Ndangamurage y’Amateka y’Urugamba rwo Guhagarika Jenoside, aba ba Ofisiye bato beretswe amateka y’urugamba rwabohoye igihugu rukanarokora Abatutsi bicwaga muri Jenoside. Basobanuriwe ubutwari bw’abari mu Ngabo za RPA-Inkotanyi ndetse banerekwa amafoto n’ibindi bimenyetso bigaragaza ibyaranze urwo rugamba.
Urugendoshuri rwakomereje ku Ishami rya Polisi rishinzwe Ikoranabuhanga, aho basobanuriwe uburyo ikoranabuhanga rigezweho rifasha Polisi mu gukumira no gutahura ibyaha, gukurikirana ibikorwa by’umutekano no guhuza ibikorwa by’inzego zitandukanye mu gucunga umutekano w’igihugu.
Umuyobozi ushinzwe amasomo mu Kigo cya CTTC cya Mayange, Assistant Commissioner of Police (ACP) Méthode Munyaneza, wari uyoboye aba banyeshuri, yavuze ko uru rugendoshuri ari kimwe mu bigize amasomo bahabwa kugira ngo barusheho gusobanukirwa uburyo ibyo bigira mu ishuri bishyirwa mu bikorwa.
Yagize ati: "Intego nyamukuru y’uru rugendo ni ukwigisha ba Ofisiye amateka n’inkomoko ya Jenoside yakorewe Abatutsi mu 1994, kugira ngo barusheho gusobanukirwa neza inkomoko n’ingaruka zayo, bityo bibafashe kugira uruhare mu gukumira ibikorwa byose bishobora guhungabanya ubumwe bw’Abanyarwanda."
ACP Munyaneza yavuze kandi ko gusura inzego zitandukanye za Leta bifasha aba banyeshuri kumenya neza uburyo ibigo bya Leta bikorana mu kubungabunga umutekano, guteza imbere imiyoborere myiza no kubahiriza amategeko.
Yongeyeho ko uru rugendoshuri rugamije no kubaka indangagaciro z’ubunyamwuga, ubunyangamugayo n’inshingano mu bapolisi n’abakozi b’izindi nzego zishinzwe iyubahirizwa ry’amategeko, kugira ngo bazabashe kurushaho gukora akazi kabo mu mucyo, ubutabera no kurushaho gukorera abaturage.
Abategura aya mahugurwa bavuga ko guhuza amasomo yo mu ishuri n’ubunararibonye bwo gusura inzego zitandukanye ari imwe mu nzira zitanga umusaruro mu gutegura abapolisi n’abagenzacyaha bafite ubumenyi buhagije, basobanukiwe amateka y’igihugu kandi bashoboye guhangana n’ibibazo by’umutekano biriho n’ibishobora kuvuka mu gihe kiri imbere.
