Uyu muhango wabaye kuri uyu wa Gatanu tariki ya 20 Kamena 2025, uyobowe na Minisitiri w'Uburezi, Joseph Nsengimana, witabiriwe n'Umuyobozi Mukuru wa Polisi y'u Rwanda (IGP), abayobozi bakuru mu nzego z'umutekano, abadipolomate ndetse n'imiryango y'abarangije aya masomo.
Abarangije amasomo ni icyiciro cya 14 cy'aba Ofisiye Bakuru bahabwa aya masomo, barimo Abanyarwanda 23 ndetse n'abandi 15 baturutse mu bihugu icyenda bya Afurika birimo Eswatini, Gambia, Kenya, Malawi, Namibia, Repubulika ya Centrafrique, Somalia, Sudani y'Epfo na Uganda.
Mu ijambo rye, Minisitiri w'Uburezi, Joseph Nsengimana, yavuze ko impamyabumenyi bahawe atari iherezo ry'urugendo rwo kwiga, ahubwo ari intangiriro yo gukomeza kwiyungura ubumenyi bujyanye n'impinduka zikomeje kugaragara mu rwego rw'umutekano.
Yagize ati: "Nk'abayobozi, mugomba gukomeza kwiyungura ubumenyi, kwiyubaka no kwakira impinduka kugira ngo mubashe guhangana n'imbogamizi zikomeje kugaragara mu bijyanye n'umutekano."
Yashimangiye ko umuyobozi mwiza adakwiye gushingira gusa ku bumenyi, ahubwo agomba no kugira imyumvire iboneye n'ubushobozi bwo gushyira mu bikorwa ibyo yize.
Ati: "Ubumenyi budufasha gusobanukirwa ibibazo duhura na byo, ubumenyi ngiro bugadufasha kubikemura, ariko imyumvire ni yo igena uburyo tuyobora, dukorera abaturage kandi tugatera abandi imbaraga. Abayobozi beza ni abahuza ibi byose."
Yakomeje asaba aba ba Ofisiye gukomeza kuyobora mu mucyo, kubaka ubufatanye hagati y'ibihugu no guharanira kubahiriza uburenganzira bwa muntu mu kazi kabo ka buri munsi.
Umuyobozi Mukuru wa African Leadership University (ALU), Sidee Dlamini, yavuze ko ubufatanye hagati y'iyi kaminuza na Polisi y'u Rwanda bumaze imyaka itanu butanga umusaruro ushimishije.
Yagaragaje ko muri iyo myaka hamaze kurangiza ibyiciro bitanu bigizwe n'abanyeshuri 165, ibintu yavuze ko byerekana ubushobozi bw'inzego za Afurika bwo gukorera hamwe.
Yagize ati: "Byatangiye ari icyerekezo gishya kandi gikomeye, ariko ubu cyahindutse urugero rwiza rw'uburyo inzego za Afurika zishobora gukorana mu guteza imbere ubuyobozi n'umutekano."
Yakomeje asaba aba ba Ofisiye kuzarangwa n'ubunyangamugayo, kutabogama no guhanga udushya mu gukemura ibibazo by'umutekano byambukiranya imipaka.
Umuyobozi Mukuru Wungirije wa Kaminuza y'u Rwanda, Assoc. Prof. Didas Kayihura, yasabye aba barangije aya masomo gukoresha neza ubumenyi n'ubunararibonye bungutse mu kubaka amahoro arambye no gukemura amakimbirane mu bihugu byabo.
Yagize ati: "Mujye mushishoza kandi mube ab'ibanze mu guhosha amacakubiri no gukemura amakimbirane aho agaragara. Muzabe abayobozi batega amatwi abo bayobora, kuko umuyobozi nyawe akorera abaturage kandi akubaka icyizere."
Aya masomo amara umwaka umwe yigirwa mu Ishuri Rikuru rya Polisi ku bufatanye na Kaminuza y'u Rwanda (UR) na African Leadership University (ALU).
Yigisha abayobozi bo mu nzego zishinzwe kubahiriza amategeko amasomo yibanda ku kubaka amahoro no gukemura amakimbirane, imiyoborere ihamye ndetse no kuyobora ibikorwa byo kubungabunga amahoro.
Abayarangije bahabwa impamyabumenyi y'icyiciro cya gatatu cya Kaminuza (Masters), ibafasha kongera ubushobozi mu buyobozi no mu guhangana n'ibibazo by'umutekano bikomeje guhindagurika ku mugabane wa Afurika.
Aya mahugurwa akomeje kuba imwe mu nkingi zifasha kubaka abayobozi bafite ubumenyi, ubunyamwuga n'icyerekezo, bashobora guhangana n'ibibazo by'umutekano no guteza imbere amahoro n'iterambere mu bihugu byabo no mu karere ka Afurika muri rusange.
Ba Ofisiye Bakuru 38 bo mu bihugu 10 bya Afurika basoje Master's mu Ishuri Rikuru rya Polisi riri i Musanze