Auddy Kelly yagarutse i Kigali, yishimira kureba Amavubi atsinda Estonia

Uyu mukino wabaye ku wa Mbere, tariki ya 30 Werurwe 2026, muri Sitade Amahoro, wari witezwe cyane n’abakunzi b’umupira w’amaguru mu Rwanda. Amavubi yegukanye igikombe cya FIFA Series.

Abafana benshi baturutse impande zose z’igihugu bari bitabiriye uyu mukino, aho bamwe bashyigikiye Amavubi mu gihe abandi bashyigikiye Estonia, bityo bikagaragaza uburyo umukino wateguwe neza wari ufite umwuka w’amarushanwa n’ubushuti hagati y’ibihugu.

Mu butumwa yashyize kuri konti ye ya Instagram kuri uyu wa Gatatu tariki ya 1 Mata 2026, Auddy Kelly yagaragaje ko ari umwe mu barebye uyu mukino, anerekana ko yatewe ishema no kuba mu Rwanda mu gihe habaye iyi ntsinzi. Yanditse agira ati: "Nkumbuye Kigali, kuba nari mu rugo byari byiza cyane. Amavubi mwarakoze cyane."

Umuhanzi wamenyekanye mu ndirimbo nka ‘Utazatinda’, ‘Kubi’, ‘Ruzakugarura’ ndetse na ‘Sinzagutererana’ yakoranye na Jody Phibi, yagaragaje ko urugendo rwe rwabaye mu buryo bw’ibanga, kuko nta mafoto menshi yagaragaye amwerekana mu mujyi.

Amakuru InyaRwanda, yabonye avuga ko nyuma yo gusura Kigali, Auddy Kelly yahise akomeza urugendo rwe muri Canada, aho asanzwe abarizwa, ariko agaragaza ko iri tangazo ryo kugera mu gihugu cye cy’amavuko rwari urugendo rwe rwo kwishimira intsinzi y’ikipe y’igihugu.

Auddy Kelly yaherukaga gusohora indirimbo yakoranye n’umuhanzikazi w’indirimbo zo kuramya no guhimbaza Imana, Aline Gahongayire, kandi kuva icyo gihe yatangiye gukorera ku ndirimbo zigize album ye nshya, aho abakunzi be bategereje byinshi birimo imiririmbire ya kizungu n’iy’umuco nyarwanda.

Uyu mugabo w’umuhanzi wigaragaje ku rwego mpuzamahanga, yemeza ko urugendo rwe rw’ubuhanzi rutazimiza n’ubwo yibanda ku ndirimbo zigezweho, ahubwo rugakomereza ku gufasha abahanzi batoya no gukomeza gushimangira izina rye mu muziki w’u Rwanda no hanze yacyo.

Auddy Kelly agarutse i Kigali mu rugendo rwe rw’ibanga, yishimira kureba Amavubi atsinda Estonia

Umuhanzi wamenyekanye mu ndirimbo ‘Utazatinda’ yakomeje urugendo rwe mu gihugu cya Canada nyuma yo gusura Kigali

Ubutumwa bwa Auddy Kelly bugaragaza ko yageze i Kigali, ni nyuma y’imyaka irenga ine abarizwa muri Canada, ari naho akorera umuziki

KANDA HANO UBASHE KUREBA INDIRIMBO AUDDY KELLY YAKORANYE NA GAHONGAYIRE