Atome azerekana uyu mukino i Kigali ku wa 7 Ugushyingo 2026,
muri Kigali Convention Centre (KCC), mu gitaramo azakoresha n’umwanya wo
kuganira n’urubyiruko ku mateka, indangagaciro n’inshingano zarwo mu kubaka
igihugu.
Mu kiganiro yatanze asobanura iby’iki gitaramo, Atome yavuze
ko Ruti Jöel yamugaragarizaga ko akunda cyane umukino ‘Carte D’Identité’,
ndetse ko buri gihe bahuraga amwibutsaga ko azifuza kuzawukinamo. Ibi byatumye
amuhitamo kugira ngo bazawuhuzeho imbaraga.
Yagize ati: “Ruti akiri muto cyane, akiri gati, buri gihe
uko twahuraga yanyibutsaga igihe nzazanira ‘Carte D’Identité’. Urumva ko nawe
hari icyo yasigaranye. Ruti yarawukunze cyane ni yo mpamvu nahisemo
kumwifashisha. Nta gutoranya abakinnyi kwabayeho (recruitment), ni uko twahuje
bisanzwe.”
‘Carte D’Identité’ ni umukino umaze imyaka isaga 15 ukozwe,
ukaba waragize uruhare mu kumenyekanisha Atome ku rwego mpuzamahanga. Uvuga ku
buzima bwite bw’uyu munyarwenya, amateka y’umuryango we n’urugendo rwe rwo
gushaka gusobanukirwa inkomoko ye n’indangamuntu ye.
Muri uyu mukino, Atome agaruka ku mateka y’u Rwanda
n’ay’Abanyarwanda, Jenoside yakorewe Abatutsi mu 1994, ubwiyunge n’uburyo
amateka agira uruhare mu gusobanura abo abantu ari bo.
Anavuga ku buzima bwe bwite, aho agaruka ku kuvukira i
Burundi, uko yaje kugera mu Bubiligi, nyuma akajya mu Bufaransa, ndetse
n’ibyamubayeho byagize uruhare mu kumugira uwo ari we uyu munsi.
Atome avuga ko kuba yarisanze mu gisirikare bifitanye isano
n’amateka y’iwabo n’ay’igihugu cye, ariko ko muri uyu mukino atagarukira ku
mateka rusange gusa, ahubwo anagaruka ku rugendo rwe bwite.
Iki gitaramo Atome yagiteguye mu buryo bwihariye, akita
‘Legacy Series’, ashaka kwerekana ko umurage w’amateka n’ibikorwa by’ababayeho
mbere y’igihe cy’ubu ugomba gukomeza guhererekanywa n’ibisekuru bizakurikiraho.
Yasobanuye ko intego ye ari ukwereka urubyiruko ko hari
byinshi u Rwanda rwagezeho binyuze mu bantu bari bakiri bato mu bihe byashize,
bityo n’urubyiruko rw’ubu rukwiye kumenya ko rushobora kugira uruhare mu gukora
ibihangano n’ibikorwa bizasigara mu mateka.
Yifuza ko urubyiruko rwamenya amateka y’abababanjirije,
rukamenya ibyo bakoze n’inshingano barwo mu gukomeza kubaka igihugu, ariko
ubutumwa bukabageraho mu buryo bworoshye, butarimo kubahatira cyangwa
kubwumvisha binyuze mu gitugu.
Ati “Urubyiruko rw’ubu rukwiye kuzirikana ko hari abandi
barubanjirije bakoresheje igihe cyabo cy’ubuto bagakora ibikorwa bikomeye kandi
birambye, ariko ko na bo ari bo bazasimburwa n’abandi mu gihe kizaza.”
Mu rwego rwo guha urubyiruko ijambo, Atome yatumiye
urubyiruko ruri hagati y’imyaka 15 na 26, abinyujije muri Minisiteri ifite mu
nshingano urubyiruko n’iterambere ry’ubuhanzi. Aba bazahabwa umwanya wo
kumubaza ibibazo no kuganira na we mu gice cyiswe ‘Legacy Talks’.
Mbere y’uko Atome agaragaza ‘Carte D’Identité’, hazabanza
igikorwa cy’iminota iri hagati ya 20 na 30 cyiswe ‘Legacy Diaries’,
kikazagaragaramo umushinga w’abahanzi bakizamuka.
Iki gikorwa kizaba ari intangiriro y’ibindi Atome ateganya
gukora mu rwego rwo guteza imbere impano no guhererekanya umurage mu rubyiruko.
Ni na kimwe mu bikorwa azifashisha mu guteguza ibindi bikorwa ateganya kugeza
muri BK Arena.
Nyuma y’iki gikorwa, hazakurikiraho umukino ‘Carte
D’Identité’, Atome ateganya kumara hafi isaha n’iminota 30 awugaragaza, hanyuma
hakabaho umwanya wo kuganira n’abitabiriye.
I Kigali, uyu mukino uzaba ugarutse ku nshuro ya gatatu,
nyuma y’uko uherukaga kuhakinirwa mu 2016. Icyo gihe, wari mu bikorwa
byamufashije kumenyekanisha ubuhanzi bwe n’urugendo rwo gushaka gusobanukirwa
inkomoko ye.
Nyuma yo kuwugaragaza i Kigali, Atome ateganya gukomereza mu
yindi mijyi yo hirya no hino ku Isi irimo Dakar muri Sénégal, Abidjan muri Côte
d’Ivoire, Paris mu Bufaransa, Bruxelles mu Bubiligi, Genève mu Busuwisi,
Stockholm muri Suède, Montréal na Edmonton muri Canada ndetse n’ahandi.
Atome ni umwe mu Banyarwanda bazwi mu bijyanye n’ikinamico,
filime n’urwenya. Ibikorwa bye byibanda ku mateka, umuco n’imibereho y’abantu,
bikamufasha kugeza ku babikurikirana ubutumwa bukomeye binyuze mu buhanzi.
Ruti Jöel agiye kugira uruhare mu mukino ‘Identity Card’ wa Atome, nyuma yo kugaragaza ko yawukunze cyane kuva kera
Atome agiye kugaragaza umukino ‘Carte D’Identité’ i Kigali ku nshuro ya gatatu, aho azagaruka ku mateka y’u Rwanda, ubwiyunge n’umwirondoro
