Aya masezerano mashya azatuma Emirates ikomeza kwamamarizwa ku mwambaro wa mbere w'ikipe, imyambaro y'imyitozo ndetse inakomeze kugira uburenganzira ku izina ry'ikibuga cya Emirates Stadium, nk'uko byari bisanzwe.
Iri vugururwa rije nyuma y'uko Arsenal yegukanye igikombe cya Premier League bwa mbere nyuma y'imyaka irenga 20, ibintu ubuyobozi bw'iyi kipe buvuga ko bibahaye amahirwe yo gukomeza kwagura ibikorwa by'ubucuruzi no kongera agaciro k'ikipe ku rwego mpuzamahanga.
Umuyobozi Mukuru wa Arsenal, Richard Garlick, yavuze ko iki gikombe cyabaye intambwe ikomeye mu mateka y'ikipe, anashimira Emirates yakomeje kuyiba hafi mu bihe byose.
Yagize ati: "Kwegukana Premier League ni kimwe mu bihe by'ingenzi mu mateka ya Arsenal kandi ni intsinzi dusangiye n'abafana bacu bose. Emirates yabaye umufatanyabikorwa w'ingenzi muri uru rugendo, idushyigikira mu bihe byiza n'ibikomeye twanyuzemo mu myaka irenga 20 ishize."
Yakomeje avuga ko intsinzi ya shampiyona yabongereye icyizere cyo gukomeza gutera imbere. Ati: "Iki gikombe kiduhaye amahirwe yo kurushaho kugira intego nini no kubaka ku byo tumaze kugeraho.
Kuvugurura aya masezerano bigaragaza ko twese twizera ejo hazaza ha Arsenal kandi twiyemeje gukomeza gutera imbere. Ubufatanye bukomeye, kimwe n'ikipe ikomeye, ntibuhagarara."
Arsenal na Emirates batangiye gukorana mu mwaka wa 2006, ubwo iyi kipe yavaga ku kibuga cya Highbury yimukira kuri Emirates Stadium. Aya masezerano mashya asobanuye ko ubu bufatanye buzaba bumaze nibura imyaka 27.
Kimwe mu bikorwa byaranze ubu bufatanye ni irushanwa rya Emirates Cup, ryatangiye gukinwa mu 2007. Uyu mwaka rizagaruka muri iyi weekend, aho Arsenal izakira Borussia Dortmund ku Cyumweru, tariki ya 9 Kanama.
Nyuma yo kwakira Borussia Dortmund muri Emirates Cup, Arsenal izongera gukinira iwayo yakira Como ku wa Gatatu, tariki ya 12 Kanama, mbere yo guhura na Manchester City mu mukino wa Community Shield uzafungura ku mugaragaro umwaka w'imikino wa 2026/27 ku wa 15 Kanama.