Uyu Munya-Brazil w'imyaka 26 ari mu bakinnyi Arsenal yashyize ku rutonde rw'abo yifuza kongeramo kugira ngo ikomeze kubaka ubusatirizi bukomeye mbere y'igihe gishya cya shampiyona. Nubwo bimeze bityo, amakuru avuga ko ibiganiro bikiri mu ntangiriro kandi nta cyemezo kirafatwa ku mpande zombi.
Kugeza ubu nta biganiro biratangira hagati ya Arsenal na Real Madrid, ariko igitekerezo cyo kugerageza gusinyisha Vinicius Junior cyamaze kwemerwa n'abayobozi bakuru b'iyi kipe y'i Londres.
Vinicius Junior asigaje amezi 12 gusa ku masezerano afitanye na Real Madrid nyuma y'imyaka umunani ayikinira, ariko ibiganiro byo kuyongera ntibiragera ku musozo. Ibi bituma ejo hazaza he hakomeza kuvugisha benshi.
Real Madrid na yo ntifuza kumubura nta mafaranga imubonyeho, cyane cyane ko mu gihe yakomeza kugeza amasezerano arangiye yari kuzahabwa amafaranga menshi nk'agahimbazamusyi k'ubudahemuka (loyalty bonus).
Mu Gikombe cy'Isi cy'uyu mwaka, Vinicius Junior yitwaye neza cyane ari kumwe na Brazil. Yakinnye imikino yose uko ari itanu, atsinda ibitego bine mbere y'uko ikipe yatozwaga na Carlo Ancelotti isezererwa na Norway muri 1/8 cy'irangiza.
Mu mwaka w'imikino wa 2025/26, Vinicius yatsinze ibitego 22 mu marushanwa yose akinamo. Icyakora, Real Madrid yongeye gusoza umwaka nta gikombe yegukanye, iza ku mwanya wa kabiri muri La Liga irushwa amanota umunani na Barcelona.
Vinicius Junior yageze muri Real Madrid mu 2018 avuye muri Flamengo yo muri Brazil. Mu gihe amaze muri iyi kipe, yakinnye imikino 375, atsinda ibitego 128 anatanga imipira 100 yavuyemo ibitego, ibintu byamugize umwe mu bakinnyi b'ingenzi bayo mu myaka ishize.
Nubwo Arsenal yatangiye kumwifuza, icyemezo cya nyuma kizaterwa n'uko ibiganiro byo kongera amasezerano hagati ya Vinicius Junior na Real Madrid bizagenda, ndetse n'icyo impande zombi zizemeranyaho mu mezi ari imbere.
Arsenal yatangiye gukurikiranira hafi Vinicius Jr wa Real Madrid