Uyu mukino wo ku munsi wa mbere aho ari na wo wabimburiye indi, wakinwe kuri uyu Gatanu tariki ya 21 Kanama 2026 saa Tatu z'ijoro kuri Emirates Stadium. Arsenal yatangiye umukino ihererekanya neza ndetse ari ko ibona uburyo imbere y’izamu ariko ntibubyaze umusaruro.
Ku munota wa 6 gusa, Bukayo Saka yashoboraga gufungura amazamu ku mupira mwiza yari abonye awufunga neza arekura ishoti ariko ba myugariro ba Conventry City barirambika. Bidatinze ku munota wa 14, Kai Havertz yahise afungura amazamu ku mupira yahawe na Riccardo Calafiori.
Ku munota wa 22, Bukayo Saka yatsinze igitego cya kabiri ku mupira wari uhinduwe na Christos Tzollis umunyezamu wa Conventry City, Carl Rushworth awukuramo usanga Bukayo Saka ahita awushyira mu izamu.
Nyuma yo kubona igitego cya kabiri, ikipe ya Arsenal yabaye nk’igabanyije umurego ku gusatira cyane. Ku munota wa 40 Matt Grimes wa Conventry City yagerageje uburyo arekura ishoti agaramye ariko rinyura hejuru y’izamu gato cyane.
Mu gice cya kabiri, Arsenal n’ubundi yaje ishaka gushimangira intsinzi yayo ubundi ku munota wa 49 Martin Odegaard atsinda igitego cya gatatu ahawe umupira na Ben White. Umukino warangiye Arsenal itsinze Conventry City ibitego 3-0 ihita ifata umwanya wa mbere n’amanota 3.
Kuri uyu wa Gatandatu imikino ya shampiyona y’u Bwongereza irakomeza hakinwa irimo uwo Hull City yakiramo Manchester United saa Saba n’iminota 30.
Martin Odegaard yishimira igitego yatsinze
Bukayo Saka yishimira igitego yatsinze