Manchester City yari yatsinze umukino ubanza ibitego 2-0, maze mu mukino wo kwishyura wabaye ku wa Gatatu tariki ya 4 Gashyantare 2026, itsinda ibitego 3 mu gice cya mbere, bituma Newcastle—ari nayo yari ifite igikombe—ibura amahirwe yo gukomeza. Umukino warangiye Manchester City itsinze ibitego 3-1 cya Newcastle.
Nubwo Newcastle yari ifite igikombe iheruka yegukanye umwaka ushize, iyi ntsinzi ya Manchester City yayambuye burundu amahirwe yo kugera muri Final, ibintu byababaje cyane abakinnyi bayo kuko bifuzaga kongera kwisubiza iki gikombe.
Ku rundi ruhande, ku wa Kabiri w'iki cyumweru ni bwo Arsenal yabonye itike yo gukina Final ya Carabao Cup nyuma yo gusezerera Chelsea ku giteranyo cy’ibitego 4-2. Umukino ubanza wari warangiye Arsenal itsinze Chelsea ibitego 3-2, naho mu mukino wo kwishyura Arsenal irongera idwinga Chelsea igiteko 1-0 cyabonetse mu masegonda ya nyuma y'umukino.
Wesley Fofana wa Chelsea w'imyaka 25 y'amavuko yagaragaye arimo kurira cyane nyuma y’uko Chelsea isezerewe muri Carabao Cup. Kimwe mu byatumye arira ni uko mu mikino yabanje muri iri rushanwa yari yicajwe ku ntebe y'abasimbura, hanyuma akiyambazwa mu mikino ya kimwe cya kabiri bikarangira basezerewe.
Manchester City imaze kwegukana iki gikombe inshuro eshanu mu myaka 10 ishize, harimo no gutsinda Arsenal muri Final yo mu 2018 yabereye kuri Stade ya Wembley i London. Icyo gihe Mikel Arteta utoza Arsenal muri iki gihe, yari Umutoza Wungirije muri Manchester City aho yari yungirije Pep Guardiola ukiyitoza magingo aya.
Arsenal na Manchester City zigiye gucakirana ku mukino wa Nyuma wa Carabao Cup, mu gihe zikubanye no muri shampiyona y'u Bwongereza, akaba ari zo zihabwa amahirwe yo kwegukana igikombe cy'uyu mwaka. Mu mikino 24 imaze gukirwa, Arsenal ni yo iyoboye Premier League n'amanota 53 ikaba irusha Manchester City ya kabiri amanota atandatu, kuko City ifite amanota 47.
Final ya Carabao Cup 2026 izaba ryari? Umukino wa nyuma w'iri rushanwa rya Carabao Cup uzaba tariki ya 22 Werurwe 2026 ubere kuri Stade ya Wembley mu Mujyi wa London mu Bwongereza.
Carabao Cup, yahoze yitwa EFL Cup, yatangiye gukinwa mu 1960. Dore abegukanye iki gikombe mu myaka 20 ishize:
2025: Newcastle United
2024: Liverpool
2023: Manchester United
2022: Liverpool
2021: Manchester City
2020: Manchester City
2019: Manchester City
2018: Manchester City
2017: Manchester United
2016: Manchester City
2015: Chelsea
2014: Manchester City
2013: Swansea City
2012: Liverpool
2011: Birmingham City
2010: Manchester United
2009: Manchester United
2008: Tottenham Hotspur
2007: Chelsea
2006: Manchester United
Manchester City yasezereye Newcastle mu buryo bukomeye
Ubwo Arsenal yakuragamo Chelsea byababaje cyane abakinnyi ba Chelsea bamwe bararira
Wesley Fofana yashavujwe cyane no gukurwamo na Arsenal
Arsenal na Manchester City zizahura mu mukino ukomeye wa Final ya Carabao Cup