Uyu mukino uje mu gihe Arsenal iyoboye shampiyona ikomeje kwitwara neza, mu gihe Liverpool yo yatangiye nabi umwaka wa 2026 nyuma yo kunganya na Leeds ndetse na Fulham, ibintu byahagaritse umuvuduko bari bamaze kugenda bubaka mu Ukuboza.
Kuri ubu Arsenal iri ku mwanya wa mbere n'amanota 48 mu mikino 20, mu gihe Liverpool iri ku mwanya wa 4 n'amanota 34 mu mikino 20. Biragoye ndetse cyane kuba Liverpool yazatwara igikombew cy'uyu mwaka ukirikije ikinyuranyo cy'amanota 14 kiri hagati yayo na Arsenal iri kuryana cyane muri iyi minsi.
Liverpool iri mu bihe bigoye, aho icyahoze ari icyizere cyo guhatanira igikombe gisa n’icyazimye. Uwahoze ari rutahizamu wa Liverpool akaba n’umusesenguzi, John Aldridge, ahamya ko mu by’ukuri Liverpool iri kurwanira kuzasoreza mu makipe ane ya mbere, kugira ngo izabone itike yo gukina Champions League y’umwaka utaha.
Umusesenguzi wa BBC Sport, Chris Sutton, yavuze uko abona uyu mukino w'uyu munsi utegerejwe na benshi, avuga ko Arsenal iri butsinde Liverpool ibitego 2-0 mu buryo bworoshye.
Sutton yavuze ko Arsenal iri ku rwego rutandukanye cyane na Liverpool uyu mwaka, ku buryo bisa n’aho bakina shampiyona zitandukanye. Yagize ati: “Arsenal igomba gusatira umukino nta bwoba, kuko iri hejuru cyane ya Liverpool.
Nta muntu n’umwe ukibona Liverpool nk’ikipe ishobora gutwara Premier League, nubwo iri ku mwanya wa kane. Ntigaragara nk’ikipe ishobora gufata umurongo muremure w’intsinzi.”
Yakomeje avuga ko Liverpool yo uyu mwaka ari ikipe iri ku rwego rusanzwe cyane, bityo Arsenal ikaba ishobora kuyibyaza umusaruro igakoresha intege nke zayo. Nubwo Arsenal itarabona umusaruro uhagije wa rutahizamu Viktor Gyokeres, Sutton avuga ko bidakoma mu nkokora intsinzi yabo kuko bagenda batsinda uko byagenda kose.
Nubwo ayo magambo ya Sutton agaragaza kudaha Liverpool amahirwe, umutoza wayo Arne Slot ashobora kuyabyaza umusaruro nk’inyongera y’imbabazi n’ishyaka ryo kwitwara neza.
Akenshi, amagambo nk’ayo akunze gufatwa nk’ikintu cyo gushyirwa ku muryango w’urwambariro, kikabera abakinnyi imbaraga zo kwerekana ko ababatega iminsi bibeshya.
Ni byo koko, uko amakipe yitwaye uyu mwaka bituma Arsenal ifatwa nk’ikipe ifite amahirwe menshi yo gutsinda, kandi si kenshi Liverpool ijya mu mukino wa shampiyona ifatwa nk’idafite amahirwe menshi.
Icyakora, ibi bishobora kuyifasha kuko igitutu kinini kiri bube kiri kuri Arsenal, cyane ko ikina iri mu rugo. By’umwihariko, mu gihe Arsenal irasabwa gutsinda byanze bikunze kugira ngo ikomeze kuyobora yemye shampiyona y'u Bwongereza dore ko magingo aya irusha amanota 5 ikipe ya Manchester City iyikurikiye, ndetse ikaba izigamye umukino.
Amahirwe kuri Liverpool si ay’imbamutima gusa. Arsenal iraba isabwa gusatira ishaka intsinzi, ibyo bikaba byaha Liverpool umwanya wo gukina umupira uganisha imbere kurushaho, bitandukanye n’uko Leeds na Fulham bayikinnye barinda kwinjizwa igitego. Ibi bishobora guha ikipe ya Slot amahirwe yo kubona imyanya no kubona ibitego.
One Football iratangaza lo nubwo Liverpool iri mu bihe bigoye, uyu mukino udakwiye kuyitera ubwoba. Muri uyu mwaka w'imikino ugoye, Liverpool yatsinze amakipe akomeye arimo Arsenal, Aston Villa, Real Madrid na Inter Milan, kandi muri iyo mikino yose ntiyigeze yinjizwa igitego. Ibi bigaragaza ko nubwo itari mu bihe byiza, igifite ubushobozi bwo guhagarara imbere y’amakipe akomeye.
Abakinnyi ba Liverpool baracyafite ubunararibonye n’ubwiza bihagije bwo guhura n’imbogamizi zikomeye. Nubwo gutsinda Arsenal bishobora gusaba umukino mwiza kurusha indi yose bakinnye uyu mwaka, Liverpool igomba kwizera ko ishoboye guca agasuzuguro k’abayipfobya, igahungabanya urugamba rwo guhatanira igikombe, ikarufungurira andi makipe ayikurikiye.
Icyakora hari andi makuru abantu badakwiye kwirengagiza. Kuva shampiyona y'u Bwongereza y'uyu mwaka yatangira ntabwo Arsenal iratsindwa umukino n'umwe mu yo yakiriye mu rugo, ibintu bigaragaza ko Liverpool iza guhura n'akazi katoroshye kuri uyu mugoroba.
Mikel Arteta ari ku mwanya wa mbere muri shampiyona y'u Bwongereza no ku mwanya wa mbere muri Champions League
Ku mugoroba w'uyu wa Kane hateganyijwe umukino ukomeye wa Arsenal na Liverpool
Arsenal iri kuryana cyane muri iyi minsi; Irayoboye muri Shampiyona no muri Champions League
Liverpool ishobora kuza kwiba umugono Arsenal ishobora kuza gukina ishaka ibitego kugira ngo ikomeze kuyobora shampiyona