Uyu muhanzi watangiye kuririmba akiri umwana, amaze gukora indirimbo zisaga 20, zimwe zikaba zitarasohoka. Mu bihangano bye harimo “Muremyi”, amaze gushyira hanze mu buryo bw'amashusho, mu gihe ateganya gukomeza gusohora izindi ndirimbo no gukora album igizwe n’indirimbo zirindwi.
Aristote Bikino akora umuziki mu njyana zitandukanye zirimo Contemporary Gospel, Blues, Country, Pop, Rock na Afrobeat, agamije kugeza ubutumwa bwiza bwa Yesu Kristo ku bantu batandukanye binyuze mu bihangano bye.
“Muremyi” yavuye mu nzozi yarose
Aristote Bikino avuga ko ibitekerezo by’indirimbo ze ahanini abikomora ku gutekereza ku Mana, gusenga, gusoma Bibiliya ndetse rimwe na rimwe no mu nzozi arota.
Asobanura ko hari igihe amagambo amuzamo, akayazirikana, hanyuma igitekerezo cy’indirimbo kikagenda gikura kugeza ubwo kibaye indirimbo yuzuye.
Urugero atanga ni indirimbo ye “Muremyi”, avuga ko yatangiriye mu nzozi yarose yumvamo amagambo agira ati: “Urukundo rwawe ni yo nkinzo yanjye.”
Akomeza asobanura ko amaze kubyuka yakomeje gutekereza kuri ayo magambo, bituma atangira kubona igitekerezo cy’indirimbo, kugeza ubwo amagambo yayo n’ubutumwa itanga byuzuye.
Uyu muhanzi avuga ko ubutumwa bw’iyi ndirimbo bushingiye ku kwizera Imana nk’Umuremyi, kuyibonamo ubuhungiro no kuyiringira mu bihe bikomeye by’ubuzima.
Zaburi ya 91 ni imwe mu mirongo ya Bibiliya avuga ko yamufashije kurushaho gusobanukirwa n’ubutumwa bw’iyi ndirimbo, cyane cyane ku buryo Imana irinda abayiringira kandi ikababera ubuhungiro.
“Nifuza ko abantu bongera kwizera Imana”
Mu gusobanura intego ye mu muziki, Aristote Bikino yabwiye inyaRwanda ko yifuza gukoresha impano ye mu gufasha abantu kwegera Imana, cyane cyane abari mu bihe bikomeye.
Yagize ati: “Intego yanjye ni ugukoresha impano yanjye yo kuririmba kugira ngo ngeze ubutumwa bwiza bw’Imana ku bantu, cyane cyane abafite imitima ibabaye, abihebye, abataramenya inzira nziza y'agakiza, abacitse intege n’abanyura mu bihe bikomeye by’ubuzima.”
Akomeza avuga ko yifuza ko indirimbo ze zaba isoko y’ihumure ku bantu, zikabafasha kongera kugira ibyiringiro no kumenya ko bashobora kwiringira Imana mu bihe byose.
Yagize ati: “Nifuza ko indirimbo zanjye zafasha abantu kongera kwizera Imana, kuyegurira ubuzima bwabo no kuyibona nk’ubuhungiro bwabo bw’ukuri.”
Aristote Bikino asanga muri iki gihe abantu benshi bahugira mu bibazo by’ubuzima n’ibindi bikorwa bya buri munsi, bityo ko ari ngombwa gukomeza kubagezaho ubutumwa bubibutsa Imana n’imico yayo.
Yagize ati: “Binyuze mu muziki, nifuza kwibutsa abantu urukundo rw’Imana, kwera kwayo n’ubwiza bwayo, kuko ari yo soko y’amahoro, ihumure n’ibyiringiro.”
Akomeza avuga ko icyifuzo cye atari uko abantu bumva indirimbo ze bakishimira injyana gusa, ahubwo ko buri ndirimbo yazajya ibasigira ubutumwa bubafasha mu rugendo rwabo rwo kwizera.
Yagize ati: “Icyifuzo cyanjye ni uko umuntu wese wumva indirimbo zanjye atumva umuziki gusa, ahubwo anahabwa ubutumwa bumwegereza ku Mana kandi bukamufasha gukomeza urugendo rwe rwo kwizera.”
Yatangiye kuririmba akiri umwana, akurira mu matsinda arimo na Gisubizo Ministries
Aristote Bikino yatangiye kuririmba afite imyaka irindwi, akomeza gukurira mu makorali no mu matsinda atandukanye y’umuziki wa Gospel, harimo Gisubizo Ministries ikunzwe cyane mu muziki wo kuramya no guhimbaza Imana mu Rwanda.
Avuga ko umuziki wamubereye kimwe mu bintu by’ingenzi mu buzima bwe kuva akiri muto, kandi ko uko yakomezaga kuririmba ari na ko yarushagaho gusobanukirwa n’uruhare umuziki ushobora kugira mu buzima bw’abantu.
Asobanura ko impamvu nyamukuru akora umuziki wa Gospel ari uko yemera ko ushobora gukorakora imitima, guhumuriza abantu no kubagezaho ubutumwa bw’Imana mu buryo bwimbitse.
Yagize ati: “Impamvu nyamukuru ituma nkora umuziki wa Gospel ni uko nizera ko umuziki ushobora gukorakora imitima y’abantu, kubahumuriza no kubagezaho ubutumwa bw’Imana mu buryo bwimbitse.”
Yongeyeho ko indirimbo ishobora gufasha umuntu kongera kugira ibyiringiro, kubona ihumure no kwegera Imana, cyane cyane iyo ari mu bihe bikomeye.
Ati: “Numva mfite inshingano yo gukoresha impano nahawe kugira ngo nibutse abantu urukundo rw’Imana, kwera kwayo n’ubwiza bwayo.”
Uyu muhanzi ashimangira ko yifuza ko ibihangano bye byagira uruhare mu guhumuriza abafite imitima ibabaye, kugarurira abihebye ibyiringiro no kwibutsa abantu ko Imana ari ubuhungiro bwizewe.
Arateganya gushyira hanze album y’indirimbo zirindwi
Mu mishinga ye y’igihe kiri imbere, Aristote Bikino avuga ko ateganya gukora no gushyira hanze album igizwe n’indirimbo zirindwi, buri ndirimbo ikazaherekezwa n’amashusho yayo.
Yagize ati: “Mu mishinga yanjye iri imbere, ndifuza gukora no gushyira hanze album igizwe n’indirimbo zirindwi, buri ndirimbo ikazaherekezwa n’amashusho yayo (music video).”
Avuga ko afite n’izindi ndirimbo ziri muri studio, zimwe muri zo zikaba ziri hafi kurangira kugira ngo zishyirwe hanze.
Uyu mushinga awufata nk'uburyo bwo gukomeza kugeza ubutumwa bwiza ku bantu benshi, abifashishije indirimbo zifite ubutumwa bushingiye ku kwizera, urukundo rw’Imana n’ihumure.
Ati: “Uyu mushinga ugamije gukoresha umuziki nk’uburyo bwo guhumuriza imitima yacitse intege, gufasha abihebye kongera kugira ibyiringiro no kwibutsa abantu ko Imana ari yo buhungiro bwabo.”
Akomeza avuga ko yifuza ko buri ndirimbo izaba iri kuri iyo album yagira ubutumwa bufatika, bufasha abantu kurushaho gusobanukirwa n’Imana ndetse n’uburyo ibaherekeza mu buzima bwabo.
Yifuza ko umuziki we utaba imyidagaduro gusa
Aristote Bikino avuga ko icyerekezo cye ari ugukomeza guteza imbere impano ye, gukora ibihangano bifite ireme no kugeza umuziki we ku bantu benshi.
Arifuza ko umuziki we utazagarukira ku myidagaduro gusa, ahubwo ko uzajya unagira uruhare mu gufasha abantu kwegera Imana no gukomeza kwizera n’igihe bahuye n’ibibazo.
Yagize ati: “Icyerekezo cyanjye ni uko umuziki wanjye utaba imyidagaduro gusa, ahubwo uba inzira yo kugeza ubutumwa bwiza ku bantu, guhumuriza imitima ibabaye no gufasha abantu kubona Imana nk’ubuhungiro, ibyiringiro n’isoko y’amahoro yabo.”
Aristote Bikino afata umuziki wa Gospel nk'uburyo bwo gukoresha impano umuntu yahawe mu guhesha Imana icyubahiro no kugeza ku bandi ubutumwa bushobora kubahumuriza no kubafasha gukomeza urugendo rwabo rwo kwizera
Aristote Bikino ukora injyana zitandukanye yateguje album nshya y'indirimbo 7
Aristote Bikino yashyize hanze indirimbo nshya "Muremyi" yavuye mu nzozi yarose aryamye
REBA INDIRIMBO NSHYA "MUREMYI" YA ARISTOTE BIKINO