Amakuru y'itandukana ry'aba bombi yamenyekanye ku wa 8 Kamena 2026, aho umwe mu bantu ba hafi yabo yatangaje ko bamaze igihe baratandukanye bikaguma ari ibanga, nyuma y'imyaka hafi itatu bari bamaze bari mu rukundo.
Ariana Grande na Ethan Slater bahuriye bwa mbere ku ifatwa ry'amashusho ya filime Wicked mu 2022, nyuma baza gutangira gukundana.
Nubwo bombi bakundaga kwirinda gushyira umubano wabo mu ruhame, hari igihe Ariana yajyaga asangiza abakunzi be amafoto cyangwa ubutumwa bugaragaza urukundo rwabo ku mbuga nkoranyambaga.
Amakuru y'itandukana ryabo aje nyuma y'uko abantu benshi batangiye gukeka ko umubano wabo utari ugihagaze neza, kuko mu mezi ashize batongeye kugaragara hamwe kenshi nk'uko byari bisanzwe.
Mu gihe bari bakiri kumwe, Ethan Slater yakunze gushimira Ariana Grande ku ruhare rwe muri filime Wicked. Mu kiganiro kimwe, yavuze ko imikorere ye idasanzwe, ndetse akomeza kumushyigikira mu bikorwa bye bitandukanye.
Mu 2026, ubwo Ariana Grande yari amaze guhatanira igihembo cya Oscar mu cyiciro cy'umukinnyi mwiza wungirije, Ethan Slater yagaragaje ibyishimo byinshi, avuga ko ari ibyishimo kandi biteye amarangamutima.
Umubano wa Ariana Grande na Ethan Slater watangiye kuvugisha benshi nyuma y'uko bamwe bakekaga ko watangiye igihe Ethan yari akiri mu rushako na Lily Jay babyaranye umwana umwe.
Icyakora, Ariana na Ethan bakomeje guhakana ayo makuru, bavuga ko urukundo rwabo rutatangiye mbere y'uko buri wese asoza umubano wari usanzwe.
Mu kiganiro Ariana Grande yahaye Vanity Fair mu 2024, yavuze ko byamubabazaga kubona ibinyamakuru bimwe byandika amakuru atari yo ku buzima bwe bwite ndetse no kuri Ethan Slater. Yashimangiye ko Ethan ari umuntu mwiza kandi wita cyane ku bantu akunda.
Na Ethan Slater na we yigeze gutangaza ko byamugoye kubona ubuzima bwe bwite bugibwaho impaka n'abantu benshi batari bazi ukuri kw'ibyabaga inyuma y'amarido.
Nubwo batakiri kumwe, Ariana Grande na Ethan Slater basoje umubano wabo nyuma y'igihe kinini bari mu rukundo rwakurikiwe cyane n'itangazamakuru ndetse n'abakunzi babo ku isi yose.
Ariana Grande na Ethan Slater batandukanye nyuma y'imyaka itatu bakundana