Ari mu batumye nkora umuziki- Kevin Kade nyuma yo guhura bwa mbere na Meddy- AMAFOTO

Uyu muhuro wabaye ku wa 15 Nyakanga 2025, muri Leta ya Texas, nyuma y’igitaramo Kevin Kade yaririmbyemo mu gikorwa cya Rwanda Convention USA cyahurije hamwe abanyarwanda baba muri Leta Zunze Ubumwe za Amerika n’abandi.

Mu kiganiro yagiranye na InyaRwanda, Kevin Kade yavuze ko Meddy ari umwe mu bahanzi bakomeye bamugiriye uruhare mu gutinyuka gutangira umuziki, kuko akiri muto yumvaga indirimbo ze akazifata nk’isoko y’ibyiringiro n’icyerekezo.

Ati “Byari iby’agaciro guhura na Meddy. Ni umwe mu bahanzi nakuze ndeberaho. Afite uruhare runini mu cyemezo nafataga cyo gutangira gukora umuziki. Nahuye na we ndanezerwa, turaganira biratinda.”

Yavuze ko ibiganiro bagiranye byibanze ku muziki muri rusange n’urugendo buri umwe arimo, ariko nta biganiro byihariye ku ndirimbo bashobora gukorana byigeze bibaho.

Ati “Twaganiriye ku muziki muri rusange, tureba aho buri umwe ageze, ariko ntitwigeze tuganira ku mushinga twakorana. Ariko n’ibyo twasangiye byanyubatse.”

Uyu muhuro wabaye mu gihe Kevin Kade atari bwagaruke mu Rwanda, kuko ategerejwe mu iserukiramuco rikomeye rya Giants of Africa Festival rizabera i Kigali kuva tariki 26 Nyakanga kugeza ku ya 2 Kanama 2025. Ni iserukiramuco rihuza ubuhanzi, imideli, siporo n’umuco, rigahuza urubyiruko n’ibyamamare ku rwego mpuzamahanga.

Mu mafoto yafashwe ubwo bahuraga, Kevin Kade agaragara yambaye imyenda y’umukara n'umweru irimo imitako y’amasaro, mu gihe Meddy yambaye ikote ry’icyatsi kibisi n’ipantalo y’umukara, bombi bahagaze hanze y’inzu zigezweho, barimo guseka no gucisha make, bigaragaza icyubahiro n’ubwubahane hagati y’abahanzi babiri batandukanye mu myaka n’uburambe, ariko bahuriye ku rukundo rw’umuziki.

Kevin Kade na Meddy bahuriye muri Dallas, USA—umuhuro w’abahanzi babiri batandukanye mu myaka ariko bahuriye ku rukundo rw’umuziki 

Ubuhamya bw’aho impano ikura: Kevin Kade yahuye n’icyamamare yamureberagaho kuva akiri muto

KANDA HANO UREBE INDIRIMBO ‘FOLOMIANA’ YA KEVIN KADE, CHRISS EAZY NA THE BEN

KANDA HANO UREBE AMASHUSHO Y'INDIRIMBO ‘BLESSED' Y’UMUHANZI MEDDY