Nyuma yo gutsinda Jordan ibitego 3-1, Scaloni yavuze ko Cape Verde ari ikipe ikomeye kandi yagaragaje ubushobozi bwayo mu matsinda.
Yagize ati: "Cape Verde ntiyantunguye kuko ni ikipe nziza. Yagoye Espagne, kimwe na Uruguay ndetse na Saudi Arabia. Ifite abakinnyi bihuta kandi bafite ubuhanga."
Cape Verde yakoze amateka yo kuba igihugu gifite abaturage bake cyane, bagera ku bihumbi 525, kigeze mu mikino ya kamarampaka y'Igikombe cy'Isi cy'abagabo.
Mu itsinda H, Cape Verde yarangije ari iya kabiri inyuma ya Espagne, isiga inyuma Saudi Arabia na Uruguay yatwaye Igikombe cy'Isi inshuro ebyiri.
Umukinnyi wa Argentina, Giuliano Simeone, yavuze ko nta mukeba woroshye muri iri rushanwa. Yagize ati: "Buri gihe twibanda ku mukino wacu. Buri mukeba aba akomeye, kandi tugomba gukoresha intwaro zacu zose kugira ngo tumutsinde."
Argentina yarangije iyoboye itsinda J n'amanota icyenda nyuma yo gutsinda Algeria, Austria na Jordan, ihita ikatisha itike ya 1/16 idatsinzwe umukino n'umwe.
Rutahizamu Lautaro Martínez yavuze ko intego ya mbere yagezweho ariko ko urugendo rugikomeje. Yagize ati: "Twageze ku ntego ya mbere yo kurenga amatsinda, ariko ubu tugiye kwitegura neza umukino wa Cape Verde kuko dushaka kugera kure hashoboka."
Argentina iri aho ikorera umwiherero i Kansas City mbere yo kwerekeza i Miami, muri Leta ya Florida, aho izahurira na Cape Verde ku wa 3 Nyakanga mu mukino wa 1/16 cy'Igikombe cy'Isi.