Nubwo isoko ry’igura n’igurisha ku bakinnyi ritarafungura ndetse na shampiyona ikaba itararangira, ikipe y’Ingabo z’igihugu yatangiye urugendo rwo kwiyubaka kugira ngo mu mwaka utaha w’imikino izabe ikomeye kurushaho.
Kuri ubu biravugwa ko yumvikanye n’umunyezamu w’imyaka 27 ukinira ikipe y’igihugu ya Mozambique witwa Ernan Alberto Siluane ku bijyanye no kuba yayerekezamo.
Uyu munyezamu w’imyaka 27 asanzwe akinira Associação Black Bulls mu cyiciro cya mbere muri Mozambique kuva muri 2023. Mbere yaho yakiniraga UD Songo yari amazemo umwaka umwe avuye muri Clube Ferroviário de Maputo aho yo yari yarayigezemo muri 2018.
Mu 2021 ni bwo yahamagawe bwa mbere mu ikipe y'igihugu ya Mozambique batsinda Lesotho ibitego 5-0 mu mukino wa gicuti. Yari mu ikipe y'igihugu ya Mozambique yakinnye CHAN 2022.
APR FC yumvikanye n’uyu munyezamu mu gihe Ishimwe Pierre watangiye uyu mwaka w’imikino ari umunyezamu wa mbere atariwe uwusoje bitewe n’ibibazo bitandukanye. Hakizimana Adolphe ni we usoje umwaka w’imikino ari umunyezamu wa mbere.
Ernan Alberto Siluane yumvikanye na APR FC ku kuyerekezamo