AS Muhanga nk’ikipe yari mu rugo yatangiranye amashagaga ndetse mu minota 10 ya mbere yari yamaze kubona uburyo bwashoboraga kugira icyo butanga binyuze kuri rutahizamu wayo
Uko iminota yagendaga ikipe y’Ingabo z’igihugu nayo yinjiye mu mukino dore ko ku munota wa 15 Dauda Yussif yarekuye ishoti riremereye ariko umunyezamu wa AS Muhanga akarishyira muri koroneri itagize icyo itanga.
APR FC yakomeje kwiharira umukino, ibona igitego ku munota wa 23 gitsinzwe na Djibril Ouattara.
Mbere y’uko igice cya mbere kirangira Djibril Ouattara yatsinze igitego cya kabiri nyuma y’uko ba myugariro ba AS Muhanga bari bakoze amakosa batakaza umupira mu rubuga rw’amahina.
Mu gice cya kabiri APR FC yaje ikora impinduka mu kibuga havamo Memel Dao hajyamo Amani Michel.
Igice cya kabiri kigitangira AS Muhanga yabonye uburyo ku mupira wari uhinduwe neza ariko Kwesa Denis ashyizeho umutwe umupira usanga umunyezamu wa APR FC, Ernan Siluane awushyira muri koroneri.
Ku munota wa 71 APR FC yabonye igitego cya 3 gitsinzwe na Madou Zon ubundi umukino urangira ikipe y’Ingabo z’igihugu itsinze AS Muhanga ibitego 3-0.
APR FC izasubira mu kibuga ku wa Gatanu saa Kumi n'Ebyiri muri Stade Amahoro ikina na Zamalek SC yo mu Misiri mu mukino w’ijonjora rya kabiri rya CAF Champions League 2026/2027.
APR FC yatsinze AS Muhanga ibitego 3-0 mu mukino wa gicuti