Ni mu mukino wo kwishyura w’ijonjora ry’ibanze wabereye i Kigali kuri uyu wa Gatanu. Ikipe y’Ingabo z’igihugu yari ifite igitutu cyo gushaka intsinzi, nyuma yo gutsindirwa mu mukino ubanza wabereye muri Repubulika Iharanira Demokarasi ya Congo.
Umukino watangiye amakipe yombi akina yitonze, buri ruhande rugerageza gusoma imikinire y’uruhande bahanganye. APR FC yakomeje gushaka uburyo yabona igitego, maze ku munota wa 33 ibona umusaruro w’igitutu yashyiraga kuri Les Aigles du Congo.
Ku makosa ya ba myugariro b’iyi kipe yo muri Congo, APR FC yabonye igitego cya Djibril Ouattara cyayihesheje kuyobora umukino. Igice cya mbere cyarangiye APR FC iri imbere, ndetse yari imaze gukuramo ikinyuranyo yari ifiteho nyuma y’umukino ubanza.
APR FC yakomeje gusatira mu gice cya kabiri, maze ku munota wa 58 ibona igitego cya kabiri. Myugariro Christian, ukina ku ruhande rw’ibumoso, yateye neza umupira w’umuterekano (coup franc), awushyira mu izamu rya Les Aigles du Congo.
Les Aigles du Congo yagerageje kugaruka mu mukino, ariko APR FC nayo ikomeza gushaka uko yakomeza kugumana ubuyobozi.
Ku munota wa 75, Quattara w’ikipe y’Ingabo z’igihugu yakorewe ikosa mu rubuga rw’amahina nyuma y’umupira yari ahawe na Dauda. Umusifuzi yemeje ko ari penaliti, Quattara ayitera neza, APR FC iba ibonye igitego cya 3.
Umukino warangiye APR itsinze iyi kipe yo muri Congo ibitego 3-0 ihita ikomeza ku giteranyo cy’ibitego 3-1.
Mu cyiciro gikurikiraho, APR FC izahura n’ikipe izakomeza hagati ya Zamalek yo mu Misiri na AS Port. Mu mukino ubanza, Zamalek yari yatsinzwe na AS Port ibitego 2-1.
APR FC yasezereye Les Aigles du Congo mu irushanwa rya CAF Champions League