Ni mu mukino wakinwe kuri uyu wa Gatandatu tariki ya 18 Mata 2026 saa Cyenda kuri Stade Umuganda mu karere ka Rubavu mu Ntara y'Iburengerazuba.
Ikipe ya Etincelles FC yari imbere y’abafana bayo yatangiranye imbaraga ndetse ku munota wa Kabiri yashoboraga guhita ifungura amazamu ku ishoti riremereye ryarekuwe na Rwigema Pascal ariko umunyezamu wa APR FC aratabara.
Iyi kipe yo mu karere ka Rubavu yakomeje gukina ari yo yiharira umupira ndetse ikanabona uburyo imbere y’izamu ariko na APR FC ikanyuzamo ikabubona binyuze ku barimo rutahizamu wayo William Togui.
Ku munota wa 28 Etincelles FC yaje gufungura amazamu ku gitego cya Iraguha Awadi. Bidatinze ku munota wa 31 Etincelles FC yahise ibona igitego cya kabiri gitsinzwe na Dusabimana Anselme ahawe umupira na Niyonkuru Sadjat.
Ibyago byakomeje kuri APR FC dore ko yahise ivunikisha umukinnyi wayo Ronald Ssekiganda asimburwa na Iradukunda Pacifique.
Igice cya mbere cyarangiye Etincelles FC iyoboye n’ibitego 2-0. Igice cya kabiri cyatangiye ikipe y’Ingabo z’igihugu ari yo ifite imbaraga irimo irashaka uko yishyura ndetse hari aho Memel Dao yashoboraga kunyeganyeza inshundura ariko atera ishoti ry’abana.
APR FC yaje gukora impinduka mu kibuga havamo Hakim Kiwanuka na Memel Dao hajyamo Mamadou Sy na Mugisha Gilbert naho Etincelles FC yo ikuramo Dusabimana Anselme na Mukogotya Robert, hajyamo Rodrigue Mwinyi na Gakumba Innocent.
APR FC yakomeje kubona uburyo ariko ikabupfusha ubusa, gusa ku munota wa 90+1' Djibril Ouattara atsinda icy'impozamarira. Umukino warangiye Etincelles FC itsinze APR FC ibitego 2-1.
Kugeza ubu APR FC iri ku mwanya kabiri n’amanota 52 mu gihe Etincelles FC yo iri ku mwanya wa 16 n’amanota 25. Ni mu gihe Rayon Sports yo itegereje gukina ejo yo iri ku mwanya wa 4 n’amanota 43, bivuze ko n’itsinda hazahita hasigaramo ikinyuranyo cy’amanota 6 hagati yayo na mukeba APR FC, igakomeza kugira icyizere cyinshi ku gikombe.
Indi mikino yakinwe, Gicumbi yatsinze na AS Muhanga 2-0 naho Mukura VS itsinda Al Merrikh SC 1-0.
Shampiyona izakomeza Ejo aho Rutsiro FC izakira Rayon Sports naho Police FC yakire Bugesera FC saa Cyenda.
Abakinnyi ba Etinnceles FC bishimira intsinzi imbere y'abafana bayo