Ni mu mukino wakinwe kuri iki Cyumweru saa kumi Nebyiri n’iminota 30 kuri Kigali Pele Stadium.
Umukino watangiye wihuta ku mpande zombi zikina zisatira ndetse ku munota wa kane APR FC yashoboraga gufungura amazamu ku buryo bwari bubonywe na William Togui ariko abupfusha ubusa.
Ku munota wa 23 APR FC yaje gufungura amazamu ku gitego cya Hakim Kiwanuka ahawe umupira na Daouda Yussif.
Hari aho AS Muhanga nayo yashoboraga kubona igitego cyo kwishyura ku buryo bwabonywe na Twizerimana Onesme ariko arekuye umupira unyura hejuru y’izamu.
Igice cya mbere cyarangiye ikipe y’Ingabo z’igihugu ikiyoboye n’igitego 1-0. Mu gice cya kabiri APR FC yaje n’ubundi iri hejuru ishaka igitego cya kabiri ndetse bituma ku munota wa 59 AS Muhanga ihita ikora impinduka mu kibuga havamo Onekalit Francis hajyamo Gendeon Samuel.
Nyuma yo gukora impinduka mu kibuga iyi kipe yo mu karere ka Muhanga umukinnyi wayo ,Twizeyimana Martin yahise yerekwa ikarita ya kabiri y’umuhondo biba umutuku ubundi isigarana abakinnyi 10 mu kibuga.
APR FC yakomeje kubona uburyo binyuze ku barimo William Togui ariko ikabupfusa ubusa ubundi umukino urangira itsinze 1-0. Iyi kipe yakomeje kuba ku mwanya kabiri n’amanota 52 aho irushwa amanota abiri na Al Hilal ya mbere.
Ni mu gihe kandi irusha mukeba Rayon Sports iri ku mwanya wa kane amanota 9. Mu w’undi mukino wa shampiyona wakinwe Gorilla FC yatsinze Musanze FC ibitego 2-1. Imikino yo ku munsi wa 26 izasozwa ejo aho Al Hilal izakina na Marine FC.
APR FC yatsinze AS Muhanga 1-0