Mu gice cya mbere, APR FC yatangiye isatira cyane izamu rya Zamalek, igerageza uburyo butandukanye bwo kubona igitego. Gusa, ba myugariro ba Zamalek bakomeje kurinda izamu ryabo neza, igice cya mbere kirangira nta kipe irabona igitego.
Muri iki gice, Zamalek yibanze cyane ku kwirinda gutsindwa, mu gihe APR FC yabonye imipira myinshi y’imiterekano iva mu mfuruka z’ikibuga (corners), ariko ntiyabasha kuyibyaza umusaruro uko bikwiye.
Mu gice cya kabiri, APR FC yakomeje gusatira ndetse ibona uburyo bwiza bwo gutsinda ibitego, ariko ntibubyaze umusaruro.
Bumwe muri ubwo buryo bwaturutse ku mipira ibiri yatewe neza na myugariro Ishimwe Christian, ariko Quattara ntiyayibyaza umusaruro, kuko umupira yateye n’umutwe wanyuze hafi y’izamu.
Yongeye kubona ubundi buryo ubwo yahaga umupira William Togui wari usigaranye n’izamu wenyine, ariko awutera nabi n’ikirenge, urenga izamu hejuru.
Ku munota wa 89, ibintu byaje guhinduka ubwo Nasser Mansy Dessouky, wari winjiye mu kibuga asimbuye, yatsindiraga Zamalek igitego cy’intsinzi. Icyo gitego cyaturutse ku burangare bw’abakinnyi ba APR FC mu bwugarizi, maze Zamalek yegukana intsinzi y’igitego 1-0.
Umukino wo kwishyura uteganyijwe mu cyumweru gitaha, tariki ya 24 Ukwakira 2026 ukazabera mu Misiri, aho APR FC izaba ishaka kwihimura no gushaka itike yo gukomeza mu matsinda CAF Champions League.
APR FC yatsindiwe i Kigali na Zamalek yo mu Misiri mu gushaka Itike yo gukina amatsinda ya CAF Champions League