Kuri uyu wa Kabiri, mu itangazo rigenewe abanyamakuru, FERWAFA yavuze ko nyuma y'ibiganiro bitandukanye yagiranye n'amakipe ya APR FC, Rayon Sports, Kiyovu Sports na Police FC; None ku wa 18 Kanama 2026 hemejwe ko Super Cup 2026 izakinwa n'amakipe ane, mu mikino ibiri ya ½ cy'irangiza n'umukino wa nyuma nk'uko byari biteganyijwe.
Yavuze ko kubera ko APR FC yayimenyesheje ko itazitabira iri rushanwa muri ubu buryo bw'amakipe ane, hemejwe ko Mukura Victory Sports & Loisirs, yabaye iya gatanu muri BK Pro League ya 2025/2026 ari yo izitabira iri rushanwa nk'ikipe ya 4.
FERWAFA yavuze ko Imikino ya ½ cy'irangiza izaba ku wa Kane, tariki ya 27 Kanama 2026, kuri Kigali Pelé Stadium aho Saa Cyenda Kiyovu Sports izakina na Mukura VS naho Saa Kumi n'Ebyiri n'igice z'umugoroba Rayon Sports ikine na Police FC.
Ni mu gihe umukino wa nyuma n'umuhango wo gutanga igikombe bizaba ku Cyumweru tariki ya 30 Kanama 2026, guhera saa Cyenda z'amanywa (15h00') kuri Kigali Pelé Stadium.
FERWAFA yavuze ko buri kipe izitabira izahabwa amafaranga yo kwitabira, kandi ibihembo by'ikipe izegukana igikombe n'ikipe izaba iya kabiri bikaba byarongerewe.
Itangazo rya FERWAFA