Uyu mukino wabaye kuri uyu wa Kabiri, tariki ya 3 Ugushyingo 2026.
Igice cya mbere cyatangiye amakipe yombi agenzura umukino, ndetse APR FC igerageza gusatira izamu rya Gasogi United, ariko ba myugariro bayo bakabasha kugarira neza.
Gasogi United na yo yagerageje uburyo butandukanye bwo kugera imbere y’izamu rya APR FC, ariko umunyezamu Hakizimana Adolphe akitwara neza.
Ku munota wa 23, Byiringiro Gilbert yagize ikibazo cy’imvune bituma asimburwa na Niyonzima Abidal. Uyu mukinnyi winjiye mu kibuga asimbuye yaje guhabwa ikarita y’umuhondo nyuma yo gukorera ikosa Byiringiro Thierry wa Gasogi United.
Nyuma y’iminota 10, ku munota wa 33, Gasogi United yafunguye amazamu ibifashijwemo na kapiteni wayo, Ngono Guy Herve, watsinze igitego akoresheje uburangare bw’abakinnyi ba APR FC, barimo Yunussu na Mamadou Zon.
Nubwo APR FC yagerageje gushaka igitego cyo kwishyura binyuze ku bakinnyi bayo basatira izamu, igice cya mbere cyarangiye iyoboye inyuma ya Gasogi United yari ifite igitego 1-0.
Igice cya kabiri cyatangiranye impinduka ku ruhande rwa APR FC. Mamadou Traore yasimbuwe na Hakim Kiwanuka, mu gihe Niyonzima Abidal, wari winjiye mu kibuga asimbuye Byiringiro Gilbert, na we yahise asimburwa na Ishimwe Abdul.
Ku munota wa 61, Hakim Kiwanuka wari winjiye mu kibuga asimbuye yatsindiye APR FC igitego cyo kwishyura, ku mupira yari ahawe na William Togui.
Gasogi United na yo yakoze impinduka, Ngenzi Patrick asimbura Micomyiza Ramadhan, mu gihe Muzigamye Leon yinjiye mu kibuga asimbura Byiringiro Thierry.
APR FC yakomeje gushaka igitego cy’intsinzi, ndetse ku munota wa 87 ibona uburyo bwiza bwo gutsinda.
Hakim Kiwanuka yateye umupira mu rubuga rw’amahina, usanga Quattara, ariko ntiyabasha kuwubyaza umusaruro ngo atsinde igitego.
Amakipe yombi yakomeje kugerageza uburyo bwo kubona igitego cy’intsinzi, ariko birangira nta yindi ibashije kureba mu izamu ry’indi. Umukino warangiye amakipe yombi anganyije igitego 1-1.
Iyi ntsinzi yari yabuze ku mpande zombi yatumye APR FC ifata umwanya wa 12 ku rutonde rw’agateganyo rwa shampiyona n’amanota arindwi, aho inganya na Gasogi United yahise ifata umwanya wa 13.
