Quinn Cook w’imyaka 32 y’amavuko yamenyekanye cyane muri
NBA aho yegukanye igikombe inshuro ebyiri. Yagitwaye bwa mbere mu 2018 ari
kumwe na Golden State Warriors, yongera kugitwara mu 2020 ari kumwe na Los
Angeles Lakers.
Muri shampiyona ya NBA kandi yakiniye amakipe arimo Dallas Mavericks, New Orleans Pelicans na Cleveland Cavaliers, ndetse anakina igihe kinini muri NBA G League no mu makipe yo mu bindi bihugu birimo n’u Bushinwa.
Kuri ubu yasinyiye APR BBC bikaba biteganyijwe ko azagera i Kigali ku
wa Gatatu tariki ya 11 Werurwe 2026 nk'uko byatangajwe na The New Times.
APR imaze iminsi igura abakinnyi bashya igamije
kwitegura imikino ya BAL 2026. Mu bamaze kuyigeramo harimo Madut Akec, Mangok
Mathiang, Leonard Craig Randall na Teafale Marquise Lenard Jr..
Lenard Jr. ni umwe mu bakinnyi bitwaye neza mu
irushanwa rya BAL 2025, cyane cyane mu mikino ya BAL Nile Conference 2025
yabereye i Kigali, aho yanatoranyijwe mu bakinnyi bagize All-BAL Second Team
ndetse ashyirwa no mu All-Defensive First Team.
Amakuru kandi avuga ko APR iri hafi kurangiza ibiganiro byo gusinyisha umukinnyi w’Umunyecongo Garmine Kande, usanzwe akinira ikipe ya Deportivo Elemental Group Alega yo muri Espagne.
Muri BAL 2026, ikipe ya APR BBC iri mu itsinda rya Kalahari Conference aho imikino yaryo izatangira gukinwa tariki ya 27 Werurwe kugeza tariki ya 5 Mata 2026 i Pretoria muri Afurika y’Epfo.
Quinn Cook wasinyiye APR BBC ari kumwe na LeBron James
Quinn Cook wegukanye NBA inshuro ebyiri yasinyiye APR BBC
