Ku wa 29 Nyakanga 2026, Umucamanza David Happe yamukatiye imyaka 50 y'igifungo kubera icyaha cy'ubwicanyi, ayongeraho indi myaka 50 kubera ko yakoze icyo cyaha ari mu mutwe w'abagizi ba nabi, bituma igihano cye cyose kigera ku myaka 100.
Muri Kamena 2026, Larry yari yahamijwe ibyaha birimo ubwicanyi, kugerageza kwica, gucura umugambi wo gukora ubwicanyi, ibikorwa by'umutwe w'abagizi ba nabi ndetse no gutunga imbunda mu buryo bunyuranyije n'amategeko.
Ibyo byaha bifitanye isano n'igitero cyabaye ku wa 2 Gashyantare 2025 hanze y'akabyiniro ka Sonny Ray's mu mujyi wa Anderson, aho Dayla Swain yarashwe akahasiga ubuzima nk'uko tubicyesha ABC News.
Amategeko ya Indiana ateganya ibihano bikomeye ku bantu bakorera ibyaha mu mitwe y'abagizi ba nabi, kuko iyo mitwe ifatwa nk'ibangamira cyane umutekano w'abaturage bitewe n'uko ihuza abantu mu gukora ibyaha, igashaka abandi bayinjiramo kandi ikabikora igamije inyungu cyangwa kugera ku ntego zayo.
Nubwo Larry yakatiwe imyaka 100, kuba yari atarageza ku myaka 18 igihe icyaha cyakorwaga bimwemerera, nk'uko amategeko ya Indiana abiteganya, kuzajya asaba urukiko gusubiramo igihano cye nyuma yo kuba amaze nibura imyaka 20 afunzwe.
Icyakora, ibyo ntibisobanuye ko azahita arekurwa cyangwa ngo igihano cye kigabanuke. Ahubwo urukiko ruzasuzuma ubusabe bwe, Ubushinjacyaha bugire icyo bubuvugaho, ndetse n'imiryango y'abahohotewe ihabwe uburenganzira bwo gutanga ibitekerezo mbere y'uko hafatwa umwanzuro.
Muri uru rubanza kandi, Rashawn Samuels, waburanishijwe hamwe na Larry, yakatiwe ku wa 30 Nyakanga 2026 igifungo cy'imyaka 125 nyuma yo guhamwa n'ibyaha nk'ibyo.