David Anthony Burke [D4vd], yafashwe n’inzego za polisi zo muri Los Angeles, ku wa Kane w'iki cyumweru. Polisi yatangaje ko akekwaho uruhare mu rupfu rwa Celeste Rivas Hernandez, umukobwa w’imyaka 14 wari warabuze, nyuma y’uko ibisigazwa by’umubiri we bibonetse muri imwe mu modoka za Tesla zifitanye isano n’aho uyu muhanzi atuye.
Abunganizi ba D4vd bahakanye ibyo aregwa, bavuga ko nta bimenyetso bifatika bihari byerekana ko ari we wishe uwo mukobwa. Bavuze ko kugeza ubu nta cyaha kiramuhama ku mugaragaro, ahubwo afunzwe ku bw’iperereza rikomeje.
Ibiro by’umushinjacyaha byatangaje ko dosiye y’uru rubanza izagezwa kuri bo ku wa Mbere, kugira ngo basuzume niba hari ibimenyetso bihagije byatuma aregwa mu buryo bwemewe n’amategeko.
Iperereza kuri uru rupfu riracyakomeje, aho kugeza ubu hataramenyekana icyateye urupfu rw’uwo mukobwa. Polisi ikomeje gukusanya amakuru kugira ngo hamenyekane ukuri ku byabaye.
Uyu muhanzi w’imyaka 21 aracyafunzwe, ategereje icyemezo kizafatwa n’ubutabera mu minsi iri imbere.
D4vd ni muntu ki?
D4vd ukomoka i Houston muri Texas, azwi cyane mu ndirimbo za indie-pop zuje amarangamutima nka “Here With Me” na “Romantic Homicide”. Yatangiye kumenyekana akiri ingimbi, aho yashyiraga amashusho ye akina umukino wa Fortnite ku mbuga nkoranyambaga.
Nyuma yo kwiyigisha gukora umuziki, yasohoye EP ye ya mbere yise “Petals To Thorns” mu 2023. Muri uwo mwaka kandi yashyizwe ku rutonde rwa Young Hollywood rwa Variety, anahabwa amahirwe yo gufungura ibitaramo by’umuhanzikazi SZA mu rugendo rwe rwa SOS Tour.
Muri Mata 2025, yasohoye album ye ya mbere, igera ku bantu benshi ku rwego mpuzamahanga, aho afite abamwumva barenga miliyoni 22 buri kwezi kuri Spotify ndetse n’abamukurikira hafi miliyoni enye kuri TikTok.
Yanahawe inshingano na Epic Games yo gukora indirimbo ya mbere yemewe y’umukino wa Fortnite yitwa “Locked & Loaded”.
Nyuma gato y’uko umurambo wa Celeste Rivas Hernandez ubonetse, D4vd yahagaritse urugendo rwe rw’ibitaramo ku isi hose, anitandukanya n’itangazamakuru.
Polisi yari yaratangaje ko yakoze isaka mu nzu yabagamo iri muri Hollywood Hills, hafi y’aho imodoka ye ya Tesla yari yajyanywe. Uyu muhanzi kandi yakuwe mu bikorwa byo kwamamaza bya kompanyi z’Amerika zirimo Hollister na Crocs.
Muri Nzeri, umuhanzikazi Kali Uchis uzwi mu ndirimbo “Telepatía”, yatangaje ko akuyemo indirimbo bakoranye yitwa “Crashing”.
D4vd yatawe muri yombi akurikiranyweho kwaca umukobwa w'imyaka 14 y'amavuko