Aya masezerano, nubwo atararangira neza, yatumye ibiciro bya peteroli ku masoko mpuzamahanga bigabanuka, ndetse bituma habaho icyizere ko amakimbirane yari amaze gutera ibibazo bikomeye ku bukungu bw’isi ashobora kugana ku iherezo.
Perezida wa Amerika, Donald Trump, yatangaje kuri urubuga rwe rwa Truth Social ko “amasezerano na Repubulika ya Kisilamu ya Iran yarangiye”, mu gihe Minisitiri w’Intebe wa Pakistan, Shehbaz Sharif, na we yatangaje ko habonetse ubwumvikane nyuma y’ubuhuza igihugu cye cyagize. Ni mu gihe biteganyijwe ko inyandiko y’ubwumvikane izashyirwaho umukono ku wa Gatanu mu Busuwisi.
Amakuru arambuye ku byemeranyijweho ntabwo yahise atangazwa, ariko Sharif yavuze ko ayo masezerano ateganya “guhagarika burundu ibikorwa bya gisirikare ku mpande zose”, harimo n’intambara ikomeje kuba hagati ya Israel na Hezbollah muri Libani. Inama y’umutekano ya Iran Kandi yatangaje ko ibikorwa bya gisirikare bizahagarara burundu guhera ku wa Mbere nijoro.
Umuyobozi wungirije wa Minisiteri y’Ububanyi n’Amahanga ya Iran, Kazem Gharibabadi, yavuze ko mu gihe cy’iminsi 60 yo guhagarika imirwano hazakomeza ibiganiro birambuye birimo n’ikibazo cyo gukurirwaho ibihano Iran yafatiwe.
Ikibazo cy’intwaro za kirimbuzi za Iran ni kimwe mu bibazo bikomeye bizaganirwaho muri ibyo biganiro. Leta Zunze Ubumwe za Amerika zashimangiye ko gahunda ya Iran yo gutunganya uranium ikungahaye igomba kugabanywa cyangwa igahagarikwa.
Trump yavuze ko inzira ya Hormuz, imwe mu nzira zikomeye ku isi mu gutwara ingufu, izongera gufungurwa ku wa Gatanu. Yanatangaje ko yategetse guhagarika ibikorwa byo kubuza Iran gukoresha ibyambu byayo.
Nyuma y’itangazo ry’amasezerano, igiciro cya peteroli ya Brent cyagabanutseho hafi 4%, mu gihe amasoko y’imari muri Aziya yazamutse.