Iyi myitozo iyobowe na United States Africa Command (AFRICOM), iri kubera mu bihugu birimo Maroc, Ghana, Senegal na Tunisia kuva tariki ya 27 Mata kugeza ku ya 8 Gicurasi 2026. Igamije kongera ubushobozi bwo gukorera hamwe hagati y’ingabo zitandukanye no kwitegura guhangana n’ibibazo by’umutekano byihutirwa.
Abateguye iyi gahunda bavuga ko igamije: Gukomeza ubufatanye hagati y’ingabo z’ibihugu bitandukanye; Kongera ubushobozi bwo gutabara mu bihe by’ibibazo; no Kunoza uburyo bwo gusangira amakuru no gukoresha ikoranabuhanga rigezweho.
Mu myitozo harimo ibikorwa byo ku butaka, mu kirere, ku mazi, mu isanzure no mu bijyanye n’ikoranabuhanga ryo kuri internet (cyber), bigaragaza uburyo intambara z’iki gihe zisigaye zisaba guhuza imbaraga mu nzego nyinshi icyarimwe.
Mu gihugu cya Tunisia, abasirikare b’Abanyamerika barimo gukorana n’ingabo zaho mu kwitoza gukoresha ibyuma by’ubutasi ku butaka no mu bihe by’urumuri ruke.
Mu gihe muri Maroc, hari gukorerwa imyitozo ijyanye n’ubwikorezi bw’ibikoresho bya gisirikare n’ubufasha mu mikorere (logistics), hakoreshejwe n’ikoranabuhanga rigezweho ryo gusangira amakuru nka Link-16.
Hari kandi abasirikare baturutse mu ngabo zirwanira mu kirere z’Amerika bakorana n’izindi nzego zirimo Air National Guard na Reserve, mu rwego rwo gukomeza kunoza ubufatanye bwuzuye.
Iyi myitozo ibaye mu gihe Afurika iri kurushaho kuba ingenzi mu bibazo by’umutekano ku isi. Mu bice bimwe bya Sahel, ibihugu byatangiye kwegera cyane u Burusiya mu by’umutekano, mu gihe u Bushinwa bukomeje kwagura ibikorwa byabwo mu rwego rw’ishoramari n’ubufatanye bwa gisirikare.
Ku rundi ruhande, u Bufaransa bwari busanzwe bufite ijambo rikomeye muri Afurika y’Iburengerazuba, bwagabanyije ibikorwa byabwo nyuma yo gukura ingabo zabwo mu bihugu nka Mali, Burkina Faso na Niger. Ibi byose bituma Amerika ishaka kongera imbaraga zayo ku mugabane wa Afurika, binyuze mu bufatanye nk’ubu.
Imyitozo ya African Lion ni imwe mu zikomeye cyane ku mugabane wa Afurika, kandi igaragaza uruhare Afurika igenda igira mu mutekano mpuzamahanga nk'uko bitangazwa na Business Insider Africa.
Biteganyijwe ko iyi myitozo izarushaho gukomeza ubufatanye hagati y’ibihugu no kugerageza ubushobozi bw’ingabo mu guhangana n’ibibazo bikomeye bishobora kubaho mu buzima busanzwe.
Mu gihe izakomeza kugeza mu ntangiriro za Gicurasi, biteganyijwe ko izasiga ishusho nshya y’ubufatanye bwa gisirikare hagati ya Afurika n’ibindi bihugu bikomeye ku isi.