Michael Kratsios, ushinzwe ikoranabuhanga muri White House, yavuze ko Amerika ifite amakuru agaragaza ko Moonshot AI yakoresheje uburyo buzwi nka AI distillation yifashishije model ya Anthropic yitwa Fable, ifatwa nk'imwe mu zikomeye kurusha izindi. Yavuze ko ubu buryo bugamije kwiba ikoranabuhanga bwangiza ubushakashatsi n'uburenganzira bw'ibigo by'Abanyamerika.
Mu kwezi kwa Mata uyu mwaka, Minisiteri y'Ububanyi n'Amahanga ya Amerika yari yatangiye ubukangurambaga ku isi hose ivuga ko hari ibigo bimwe byo mu Bushinwa bikekwaho kwiba umutungo bwite mu by'ikoranabuhanga (intellectual property) mu rwego rwa AI.
Ku ruhande rwa Moonshot AI, ku wa Gatanu yatangaje Kimi K3, model ifite 2.8 trillion za paramètres, ivuga ko ari imwe mu zikomeye ku isi kandi yegereye ubushobozi bwa Fable ya Anthropic.
Iyi nkuru ije nyuma y'uko mu kwezi gushize Guverinoma ya Amerika ihagaritse ikoreshwa rya models za Anthropic zirimo Fable na Mythos, ivuga ko hari impungenge z'umutekano.
Nubwo bimeze bityo, abasesenguzi bavuga ko iterambere rya AI mu Bushinwa rikomeje kwihuta, rikagenda rigabanya icyuho cyari hagati yaryo n'ibigo bikomeye byo muri Amerika.
Moonshot AI ntiratangaza icyo ivuga kuri ibi birego, mu gihe amakimbirane hagati y'Amerika n'Ubushinwa ku ikoranabuhanga rya AI akomeje gufata indi ntera.