Raporo yashyizwe ahagaragara na Financial Times, ishingiye ku mibare y’ibigo n’ikorwa n’ikigo Challenger, Gray & Christmas, igaragaza ko urwego rw’ikoranabuhanga ari rwo rwagize umubare munini w’abatakaje akazi muri Leta Zunze Ubumwe za Amerika kuva uyu mwaka watangira.
Imibare igaragaza ko ibigo by’ikoranabuhanga byamaze gukuraho imirimo igera ku 140,000, bingana na kimwe cya gatatu cy’imirimo yose yakuweho muri Amerika muri uyu mwaka.
Ibigo bine bikomeye ari byo Amazon, Oracle, Meta na Microsoft byonyine byakuyeho hafi 50,000 mu bakozi babyo, bingana na hafi 6% by’abakozi b’ibi bigo bihuriyeho.
Mu gihe bamwe batakaza akazi, ayo masosiyete akomeje kongera amafaranga ashora mu bwenge bw’ubukorano. Biteganyijwe ko Amazon, Alphabet (Google), Meta na Microsoft bizashora hamwe asaga miliyari 725 z’amadolari mu kubaka ibigo bibika amakuru (data centers) muri uyu mwaka.
Ku ruhande rwa Oracle, iki kigo na cyo cyatangaje ko kizashora hafi miliyari 70 z’amadolari mu kubaka data centers nshya zizifashishwa n’abakiriya barimo na OpenAI.
Icyakora, iryo shoramari rinini ryatumye Oracle igabanya abakozi bayo ku rugero rwa 21,000 ugereranyije n’umwaka ushize, ibintu byanatumye ikigo Standard & Poor’s kigabanya icyizere cy’imari yacyo kubera impungenge z’inyungu zizava muri ayo mashoramari ya AI.
Microsoft na yo yakuyemo abandi bakozi bagera ku 4,800 muri Nyakanga 2026, cyane cyane mu ishami rya Xbox Gaming, mu rwego rwo kuvugurura ibikorwa nyuma yo kugura Activision Blizzard kuri miliyari 75 z’amadolari mu myaka ishize.
Abasesenguzi bavuga ko AI iri guhindura cyane isoko ry’umurimo. Imibare ya Challenger igaragaza ko kuva muri Gicurasi 2023, imirimo igera ku 170,000 yahujwe n’impinduka zatewe n’ubwenge bw’ubukorano.
Bimwe mu bigo byanabyemeye ku mugaragaro. Jack Dorsey, Umuyobozi Mukuru wa Block, yavuze ko AI yahinduye uburyo ikigo gikeneye abakozi, nyuma yo kugabanya hafi kimwe cya kabiri cy’abakozi bacyo bagera ku 10,000.
Nubwo ubwenge bw’ubukorano bukomeje gufatwa nk’ahazaza h’ikoranabuhanga, burimo no guhindura isoko ry’umurimo ku buryo butigeze bubaho mbere.
Mu gihe ibigo bikomeje gushora amafaranga menshi mu AI no mu kubaka data centers, ibihumbi by’abakozi bakomeje gutakaza akazi, ibintu bikomeje guteza impaka ku ngaruka AI izagira ku kazi ka muntu mu myaka iri imbere.
Source: Maaal.com/Maaal News