Amb.Gen.Patrick Nyamvumba yagiranye ibiganiro na Bruce Melodie –AMAFOTO

Ibi byatangajwe ku mugaragaro na Ambasade y’u Rwanda muri Tanzania kuri uyu wa Gatatu tariki ya 4 Gashyantare 2026, binyuze mu butumwa yashyize ku rubuga rwa X (rwahoze ari Twitter).

Ubutumwa bw’iyi Ambasade bwagaragaje ko uru ruzinduko rwa Bruce Melodie rufite intego irenze igitaramo cyangwa umushinga umwe, ahubwo rufite ishingiro ku ruhare rw’umuco muri dipolomasi y’akarere.

Mu magambo yayo, Ambasade yagize iti: “Umuco ni inkingi ikomeye ya dipolomasi. Twishimiye kwakira umuhanzi, Bruce Melodie, uri muri Tanzania mu mishinga ihuriweho n’akarere, harimo no kugirana na Ambasaderi General Patrick Nyamvumba, hagaragarizwa uko umuziki ugira uruhare mu guhuza abaturage bacu.”

Aya magambo asobanura ko u Rwanda rubona umuco n’umuziki nk’imwe mu nzira z’ingenzi zo kubaka umubano mwiza hagati y’ibihugu, aho abahanzi bagira uruhare rukomeye mu guhuza abantu, gusangira indangagaciro no gusakaza isura nziza y’igihugu.

Bruce Melodie yari aherekejwe n’abantu bakomeye mu rugendo rwe rw’umuziki barimo Kenny Mugarura, uyobora sosiyete ya 1:55 AM Ltd, isanzwe icunga ibikorwa bye, ndetse na Amani Africa, umufasha mu bijyanye no gushyira mu bikorwa imishinga ye no gutegura urubyiniro.

Ibi biganiro byabereye muri Tanzania byibanze ku mishinga y’akarere Bruce Melodie arimo, igamije guteza imbere umuziki nyarwanda no kuwuhuza n’amasoko yo mu Karere ka Afurika y’Iburasirazuba.

Uru ruzinduko rugaragaza ko Bruce Melodie atari gusa umuhanzi ukora indirimbo zikunzwe, ahubwo ari n’intumwa y’umuco nyarwanda ku rwego mpuzamahanga.

Kuba yakiriwe ku rwego rwa Ambasade, by’umwihariko n’Ambasaderi w’u Rwanda ufite ubunararibonye mu buyobozi n’umutekano, ni ikimenyetso cy’uko umuziki uri gufatwa nk’igikoresho gifite agaciro mu rwego rwa dipolomasi y’igihugu.

Mu gihe umuziki nyarwanda ukomeje kwambuka imipaka ukamenyekana mu karere no hanze yako, uru rugendo rwa Bruce Melodie muri Tanzania rufatwa nk’intambwe ikomeye mu gukomeza kubaka umubano wihariye hagati y’u Rwanda na Tanzania, binyuze mu muco, ubuhanzi n’imikoranire ishingiye ku bumwe bw’abaturage.

Tanzania yahiriye Bruce Melodie, kuko yahakoreye imishinga y’indirimbo zinyuranye zirimo na ‘Pom Pom’ yakoranye na Diamond wo muri Tanzania, ndetse na Joel Brown wo muri Nigeria.

Culture is a powerful pillar of diplomacy.
Pleased to receive Rwanda’s renowned artist @BruceMelodie during his visit to Tanzania for regional projects, including a courtesy call on the High Commissioner, General Patrick Nyamvumba — highlighting music’s role in uniting our people pic.twitter.com/elag2I6GSv

— Rwanda in Tanzania (@RwandaInTZ) February 4, 2026

 

Ambasaderi w'u Rwanda muri Tanzania, General Patrick Nyamvumba, yakiriye kandi agirana ibiganiro n’umuririmbyi Bruce Melodie

Bruce Melodie uri muri Tanzania ku mishinga y’umuziki ihuriweho n’akarere, yakiriwe muri Ambasade y’u Rwanda, hagarukwa ku musanzu w’abahanzi mu kubaka dipolomasi ishingiye ku muco

Mu ruzinduko rwe muri Tanzania, Bruce Melodie aherekejwe na Kenny Mugarura wa 1:55 AM na Amani Africa, bagiranye ibiganiro n’Ambasade y’u Rwanda byibanze ku guteza imbere umuziki nyarwanda mu Karere ka Afurika y’Iburasirazuba

Kwakira Bruce Melodie muri Tanzania byagaragaje uko umuziki nyarwanda ukomeje gufatwa nk’ikiraro gihuza abaturage n’ibihugu, mu gihe u Rwanda rukomeje gukoresha umuco nk’imbaraga za dipolomasi