Amb. Shyaka Anastase yakiriye Josh Ishimwe mbere y’igitaramo cye muri Poland –AMAFOTO

Ku wa Gatanu tariki 20 Gashyantare 2026, Josh Ishimwe abinyujije ku rukuta rwe rwa Instagram, yashimiye Prof. Shyaka ku bwo ku mwakirana urugwiro n’icyubahiro bamugaragarije.

Mu butumwa bwe yagize ati “Nyakubahwa, Ambasaderi Prof. Shyaka Anastase. Ndifuza kubagezaho ishimwe riturutse ku mutima ku bwo kunyakira neza n’urugwiro mwatugaragarije. Byari icyubahiro gikomeye n’amahirwe adasanzwe guhura namwe.”

Aya magambo agaragaza ubusabane n’icyubahiro hagati y’umuhanzi uhagarariye umuco n’ukwemera, n’uhagarariye u Rwanda muri Poland.

Josh Ishimwe azataramira mu gitaramo cyiswe Doxa Church Worship Experience, kizabera mu mujyi wa Warsaw kuri iki Cyumweru tariki 22 Gashyantare 2026. Ni igikorwa cyateguwe na Pasiteri Ntwari Steven, ari nawe uzakira uyu muhanzi ku rubyiniro.

Ni ubwa mbere uyu muririmbyi agiye kuririmba muri Poland, ibintu bifatwa nk’intambwe ikomeye mu rugendo rwe rwo kugeza ubutumwa bwiza ku banyarwanda n’inshuti z’u Rwanda batuye ku mugabane w’u Burayi.

Josh Ishimwe amaze igihe agaragaza ubudasa mu muziki wa Gospel, aho ahuza imiririmbire ya gakondo n’ijwi rifite imbaraga z’ubutumwa. Indirimbo ze zirimo ‘Nzohaguruka Ndirimbe’, ‘Reka Ndate Imana Data’, ‘Twaje Mana Yacu’, ‘Inkingi Negamiye’ na ‘Yesu Ndagukunda’ zamuhesheje igikundiro mu Rwanda no hanze yarwo.

Uru rugendo rwe muri Poland ruri kurebwa nk’igisubizo cy’umuhate amaze imyaka ashyira mu murimo wo kuririmba ubutumwa bw’ihumure n’ibyiringiro.

Kuba yakiriwe na Ambasaderi w’u Rwanda muri iki gihugu, ni ikimenyetso cy’uko ibikorwa by’abahanzi b’Abanyarwanda bikomeje guhabwa agaciro no gushyigikirwa mu ruhando mpuzamahanga.

Iki gitaramo ntikirebana gusa no kuramya no guhimbaza Imana, ahubwo ni n’umwanya wo guhuza Abanyarwanda n’inshuti zabo baba muri Poland, bakongera kwibuka umuco n’indangagaciro bibahuza n’igihugu cyabo.

Ku nshuro ya mbere agiye kuririmba muri iki gihugu, Josh Ishimwe aracyari ku ntera nshya y’urugendo rwe, aho umuziki we ukomeje kuba ururimi ruhuza imitima, rukambutsa imbibi z’ibihugu n’indimi.

Igitaramo cya Doxa Church Worship Experience gitegerejwe n’abatari bake, cyane cyane abakunzi b’indirimbo zo kuramya no guhimbaza Imana batuye i Warsaw no mu nkengero zaho, biteze ibihe byuzuye ubusabane, amasengesho n’umuziki wuje ubunyamwuga.

Amb. Prof. Shyaka Anastase yakiriye Josh Ishimwe mbere y’igitaramo cye cya mbere muri Poland

Ni ibihe by’urwibutso kuri Josh Ishimwe wakiriwe na Ambasaderi w’u Rwanda muri Poland, mbere yo gutaramira i Warsaw

Ubuhanzi na Dipolomasi byahuriye hamwe; Amb. Shyaka Anastase yakira Josh Ishimwe uri mu rugendo rw’amateka mu Burayi.

Mbere yo guhura n’abakunzi be muri Doxa Church Worship Experience, Josh Ishimwe yagaragaje ko yishimiye kugera muri Poland

Ambasaderi Prof. Shyaka Anastase yakiriye Josh Ishimwe mu biganiro byuzuyemo ubusabane n’ishimwe ku muziki urenga imbibi

KANDA HANO UREBE AMASHUSHO Y'INDIRIMBO 'INKURU' YA JOSH ISHIMWE